U nis drejt Shteteve të Bashkuara me qëllimin për të festuar 107 vjetorin e pavarësisë së Shqipërisë me komunitetin shqiptaro-amerikan, por pas tërmetit tragjik qëllimi i vizitës së Lorik Canës atje mori kuptim tjetër.
Ish-mbrojtësi i kombëtares shqiptare është fokusuar në mbledhjen e fondeve për njerëzit e prekur nga tërmeti, duke kërkuar mbështetjen e shqiptarëve që ndodhen në Amerikë.
Në një intervistë për “VOA”, Cana u shpreh se mbledhja e fondeve ka nisur dhe se do t’i administrojë vetë.
“Kemi mbledhur diku tek 50-60 mijë dollarë vetëm në mbrëmjen e parë. Duhet ta çojmë amanetin deri në fund, pasi është një detyrë morale dhe shpirtërore dhe nuk duhet të luhet me këtë gjë. Ne me fondacionin dhe me shoqatat do të evidentojmë shtëpi, kopshte ose shkollë dhe do ta bëjmë drejtpërdrejtë me fondacionin”.
“Problemi që kemi ne shqiptarët nuk është tek vështirësia. Problemi tek ne qëndron tek momenti kur ne qetësohemi dhe rikthehemi tek normaliteti. Gjithë fokusi për të ndërtuar shoqërinë mbarëkombëtare humb, sepse ne fillojmë të mendojmë si individ, si grup, si interesa dhe si parti politike”.
“Dashuria për vendin, dashuria për të investuar tek gjeneratat që vijnë. Nuk është diçka që fiket dhe ndizet. Është si besimi ndaj Zotit. Nuk mund t’i kthehemi Zotit vetëm kur kemi tragjedi, apo kur kemi fëmijë të sëmurë, apo gjendja është e sëmurë. Besimi ndaj Zotit është përditë. Atdhedashuria është njësoj. Nuk mund të ndezim atdhedashurinë vetëm kur na ndodhin tragjedi. Sepse në shumë raste ajo që na çon ne në këto ngjarje është pikërisht se ne gjatë rrugës nuk i bëjmë gjërat siç duhet”, tha Lorik Cana.
