Kreu i Partisë Agrare Ambientaliste, Agron Duka, ka ofruar një zgjidhje për të gjithë të pastrehët, që mbetën pa banesë pas tërmetit të fortë të 26 nëntorit. Në një postim në rrjet, Duka shkruan se miku i tij, Kolë Gjokaj, biznesmen në Zvicër ka ofruar kontenierë banimi, të cilat mund të strehojnë deri në 100 persona.
Sipas Dukës kjo do të duhet të jetë edhe një nga rrugët që duhen ndjekur për të zgjidhur fazën tranzitore të strehimit të qytetarëve që të mos e kalojnë dimrin në qiell të hapur.
“Procesi i rimëkëmbjes nga tragjedia që goditi vendin tonë, do të jetë i gjatë dhe do të kërkojë gjithë energjitë që shoqëria jonë do të jetë e aftë të prodhojë. Ndonëse kriza humanitare tregoi edhe njëherë brishtësinë e institucioneve tona, vala e solidaritetit ishte më e madhe se tërmeti.
Solidariteti nxori në pah se shqiptarët janë më të mëdhenj se shteti i tyre, se kufijtë që na ndajnë janë thjesht administrativë dhe shpirti që lidhë këtë komunitet ndjehu dhimbjen sikur t’i përkiste një trupi të vetëm.
Nderimet e mia shkojnë te të gjithë ata që në këto ditë të vështira vepruan për të dhënë kontributin e tyre, sipas mundësive të tyre, pavarësisht statusit social, pavarësisht se e kanë bërë përpara apo pas kamerave.
Nga ky solidarizim duhet të nis edhe ringritja. Ky bashkëpunim vëllazëror midis shqiptarëve duhet të jetë tulla e parë për të ngritur jo vetëm banesat, por edhe shtetin që ra bashkë me ato”, shkruan Duka në rrjet.
Në vijim ai shton se ai ka dhënë kontributin e tij pa bujë dhe zhurmë, për të lehtësuar sado pak gjendjen e emergjencës, dhe do të vijoj t’a bëjë derisa komuniteti ynë të ketë nevojë.
“Kjo fatkeqësi, që midis të tjerash na hapi sytë mbi situatën reale të vendit tonë, sidomos në zonat rurale, njëkohësisht na dha aftësinë për të parë qartë sa të fortë jemi kur bashkohemi dhe bashkëpunojmë. Të qëndrojmë kështu, dhe me ketë vetëdije ta ndërtojmë të ardhmen së bashku”, shkruan Duka.
