Lori Hoxha, trashëgimtarja e “Top Channel” ditën e djeshme publikoi në profilin e saj në Instagram një foto që bëri xhiron e rrjetit, ku në të shfaqej një nga operatorët e ‘Top Channel’ me djalin e tij në krah teksa punonte.
Fakti që ai ka marrë djalin në krah për ta mbajtur gjatë gjithë kohës me vete, ka qenë frika nga tërmeti, e në këtë rast prindi e ka marrë me vete në punën e tij për ta mbrojtur.
Teksa ka publikuar këtë foto të pakrahasueshme, që s’ka nevojë për shumë përshkrim, Lori ka falenderuar edhe stafin e saj, për punën që ata bëjnë.
“Një foto sa për mijëra fjalë. Në këto ditë të vështira për të prekurit nga tërmeti që humbën njerëzit e tyre më të dashur, shtëpitë dhe atyre që nga ankthi jetuan nëpër rrugë, Top Channel duhet të raportonte si gjithmonë çdo moment të asaj që po ndodhte, të ndihmonte me informacion, edhe pse kjo kërkon sakrificë dhe mund të madh. Në kohën kur mësimi në shkolla u anullua, por fëmijët e stafit, si shumë fëmijë të tjerë ishin në panik nga lëkundjet, zgjidhja më e mirë ishte që ata të rrinin bashkë me prindërit, edhe nëse atyre u duhej të punonin për një qëllim më të madh. Mbase kjo nuk është idealja, por në të tilla katastrofa kupton se vetëm duke u bërë bashkë jeta vazhdon! Mirënjohëse të gjithë stafit vetëmohues të Top Channel dhe të gjithë atyre që sakrifikuan sado pak nga “normaliteti” i tyre për ti bërë më pak të vështira këto ditë.”- ishte ky shkrimi i Lorit krahas fotos.
Ndërkohë ashtu sikundër jemi mësuar të shohim shpesh herë, nuk kanë munguar as kritikat për trashëgimtaren e “Top Channel”.
Nga komentet e shumta, Sarës, motrës së Lorit i ngjall kuriozitetin për komentin e një ndjekësi që shkruan: Po ti si pronarja ku ishe? Apo në ndonjë qytet europian duke ngrënë.
“Në katin e 15 Albi, me dy fëmijë të vegjël. Pa merak se tërmeti nuk paralajmëron as ne ‘pronarët’”– ka qenë kjo përgjigjia e Sarës.
