Rreth 175 zjarrfikës italianë u angazhuan në grupet e kërkim-shpëtimit pas tërmetit me magnitudë 6.4 të Shkallës Rihter që goditi Shqipërinë, mëngjesin e së martës.
Tërmeti shkaktoi 51 viktima, ndërsa zonat më të prekura ishin Thumana dhe Durrësi.
Ky ishte tërmeti më i fortë i 40 viteve të fundit, pas atij të 15 prillit 1979, që goditi Shkodrën.
Menjëherë pas tërmetit nga vende të ndryshme, Italia, Greqia, Franca, Serbia, dhe veçanërisht Kosova, u nisën ekipet e shpëtimit që ndihmuan ato shqiptare, në gjetjen e trupave që ndodheshin poshtë rrënojave.
Massiomi Marcocini, ishte njëri prej zjarrfikësve italianë, që u angazhua në operacionet në Durrës.
Duke folur për “Il fatto quotidiano”, ai ka treguar eksperiencën e tij, duke evidentuar mungesën e organizimit për përballimin e fatkeqësive, por edhe mirënjohjen e treguar nga njerëzit, përballë ekipeve të shpëtimit.
“Kur na shihnin, na ndalonin në rrugë dhe na falënderonin. Disa të tjerë na ofronin ushqim, ëmbëlsira. Madje disa të tjerë donin që të na jepnin edhe dhurata. Ata vazhdonin të kishin frikë pasi dridhjet vazhdonin.
Në një moment ra një me magnitudë 5.2. Isha në mes të një ndërtese. Sa mirë që nuk zgjati shumë. Shqipëria është një vend që ka përparuar shumë por ende nuk ishin të organizuar për të përballuar këto fatkeqësi”, rrëfen 51-vjeçari nga Livorno.
