Zgjerohet harta e qyteteve me gjendje të jashtëzakonshme pas tërmetit tragjik të mëngjesit të së martës. Pas Tiranës, Durrësit dhe Laçit nesër qeveria do të përfshijë nesër edhe Lezhën në perimetrin e statusit të veçantë të Gjendjes së Jashtëzakonshme nga Emergjenca Natyrore, gjë të cilën opozita e ka kërkuar prej disa ditësh.
Lajmin e dha vetë kryeministri teksa pa nga afër dëmet në pallate e banesa, ndërsa vendimi pritet që të merret nesër në mbledhjen e mëngjesit të qeverisë, sikur ka ndodhur në tre ditët e fundit. Kreu i qeverisë thotë se kjo që i ndodhi Shqipërisë është një sprovë që tundi tokën shqiptare dhe na këputi në shpirt e në trup.
“Nesër edhe Lezhën do ta përfshijmë në perimetrin e statusit të veçantë të Gjendjes së Jashtëzakonshme nga Emergjenca Natyrore. Kjo që na ka rënë në kurriz nuk është as shaka, as film, as sfidë e zakonshme e këtij shteti me trup ende të paformuar sa duhet! Kjo është sprovë që tundi tokën shqiptare dhe na këputi në shpirt e në trup! Prandaj gishtin kokës të gjithë së bashku dhe o i’a dalim bashkë o hajër nuk bëjmë më kurrë!” tha ai.
***
Në Bashkinë e Lezhës tërmeti i 26 nëntorit ka lënë pas mjaft pasoja. Deri tani raportohet për 760 banesa të dëmtuara mes tyre dhe shumë pallate brenda qytetit. Nga verifikimet që janë bërë deri më tani nga grupet e punës së bashkisë rezulton se 81 banesa janë të pabanueshme mes të cilëve dhe dy pallate, duke lënë të pastrehë qindra banorë.
Situata më problematike paraqitet brenda qytetit të Lezhës ku janë rreth 48 objekte të dëmtuara mes tyre dhe godina të institucioneve shtetërore. Kjo situatë ka detyruar qeverinë që të shpallë edhe në Lezhë gjendjen e jashtëzakonshme.
