Frika e madhe që ka ‘mbjellë’ në Shqipëri tërmeti i 26 nëntorit, shoqëruar me qindra goditje të tjera, jo dhe aq të vogla, ka bërë që njerëzit të bëhen gjithmonë e më supersticiozë.
Për shkak se tërmetet duket se vijnë nga një zonë e pasur me aktivitet sizmik, në rrjetet sociale ka nisur të shpërndahet një histori në formë legjende, që ka qarkulluar prej shekujsh.
Bëhet fjalë për historinë e Kanalit të Kuçedrës në zonën e Gjirit të Lalzit, që shkarkon ujërat e kënetës në det. Legjenda thotë se në një ditë me shumë shi e rrufe, kuçedra doli nga deti, dhe për të shpëtuar, u fut në tokë duke hapur një kanal të madh. Disa dragonj i dolën përpara dhe e mbytën. Prej asaj dite, në atë kanal del ujë vazhdimisht. Banorët e zonës nuk futen kurrë në det në drejtim të kanalit, ndërkohë që jo pak turistë janë mbytur pikërisht në atë vend.
Por për studiues lokalë, të ngecur mes shkencës dhe supersticionit, nga kanali uji del me flluska, çka do të thotë se aty shkarkohet energji e nëndheshme tokësore. Nisur nga fakti se tërmeti është shkarkim energjie, njerëzit mendojnë se kanali duhet mbajtur hapur.
Pasi kjo zonë është goditur nga qindra tërmete, në rrjet ka pasur akuza se kanali po betonizohet dhe kjo është arsyeja se përse po riaktivizohet aktiviteti sizmik.
Një denoncim në këtë drejtim e pati bërë vjet edhe ish-kryeministri Sali Berisha. Sipas tij, sizmiologu popullor e informon se shkak i tërmeteve në Gjirin e Lalzit është mbyllja e Kanalit të Kuçedrës.
Postimi i Berishës:
Shperthim i fiqishem i shatervanit me uje te zi tek Kepi i Rodonit, jo larg kjo nga Gropa e Kulcedres sic e quanin banoret nje pus te madh te zi e te thelle qe shrynte prej shekujsh gazra jo helmuese dhe qe u betonua me 300 trajlera te medhenj betoni! sb
