Në lidhje me incidentin ku basketbollisti i Tiranës, Bruno Daliu, goditi arbitrin Jurgen Muho gjatë ndeshjes me Teutën, Federata Shqiptare e Basketbollit me një deklaratë zyrtare në rrjeti social “Facebook”, ka reaguar duke e dënuar këtë ngjarje të rëndë.
Pavarësisht kësaj deklarate duhet theksuar që Federata Shqiptare e Basketbollit nuk ka marrë ende asnjë masë disiplinore ndaj klubit durrsak si organizatorë të ndeshjes dhe përgjegjësit kryesor të dhunës dhe ofendimet nga ana e tifozëve.
Deklarata e FSHB-së.
Federata Shqiptare e Basketbollit dënon ashpër ngjarjen e shëmtuar të ndodhur të shtunën në mbrëmje në Pallatin e Sportit “Ramazan Njala”, në takimin midis Teutës dhe Tiranës, e vlefshme për javën e 7-të të Superligës së Kampionatit Kombëtar të Basketbollit për Meshkuj.
Dhuna barbare e ushtruar nga njëri prej lojtarëve të Tiranës kundrejt njërit prej gjyqtarëve të takimit është krejtësisht e pa përligjur, e pa papranueshme dhe thellësisht e dënueshme.
Skena të tilla, që për më tepër u përcollën drejtpërdrejt në ekranet e shqiptarëve nuk janë asgjë të përbashkët me basketbollin dhe bien ndesh me të gjitha vlerat që përçon sporti.
Federata Shqiptare e Basketbollit i uron gjyqtarit Muho shërim sa më të shpejtë, ndërsa mbështet plotësisht veprimet e Policisë dhe autoriteteve të ligjit, në përputhje me legjislacionin përkatës.
Federata Shqiptare e Basketbollit njofton opinionin publik se teksa po administrohet protokolli i ndeshjes dhe dëshmitë e ngjarjes, si dhe pamjet filmike ditën e hënë do të mblidhet Komisioni i Disiplinës në FSHB për të shqyrtuar dhe për vendosur mbi këtë ngjarje.
Federata Shqiptare e Basketbollit
