Gjykata e Elbasanit ka dënuar me 10 vjet heqje lirie Shkëlzen Hasanpapaj, i cili akuzohet se qëlloi me breshëri automatiku në drejtim të Florenc Çapjas dhe Bledar Muçës, dy anëtarë të grupit “Çapja”, ngjarje kjo e ndodhur në qershor të 2016.
Hasanpapaj akuzohet për veprat penale “Vrasje me paramendim ndaj një ose më shume personave” e mbetur në tentative dhe “Mbajtje pa leje e armëve të zjarrit”.
Nga të shtënat i plagosur mbeti Bledar Muça që ishte në vendin e parë të pasagjerit me makinë ku udhëtonte së bashku me kushëririn e tij Florenc Çapja. Ndërkohë nga plumbat është plagosur në këmbë rastësisht një efektive e policisë së Elbasanit që ishte duke kaluar në anën tjetër të rrugës.
Pasi kreu krimin, Hasanpapaj u largua në drejtim të Holandës ku më pas u arrestua nga autoritete e këtij shteti dhe u ekstradua në Tiranë. Edhe pse gjykata e ka dënuar me 10 vite burg, Hasanpapaj nuk i ka pranuar për asnjë moment të vetëm akuzat tentativën e vrasjes të ndodhur në qershor të 2016. Por një analizë ADN ka zbuluar identifikimin e tij në këtë ngjarje të rëndë kriminale të ndodhur në qendër të Elbasanit.
