Vasil Shkurtaj është një nga sulmuesit më të mirë të kampionatit shqiptar dhe natyrisht dhe kukësit.
Në këtë sezon ai ka zhvilluar 9 ndeshje dhe ka arritur të shënojë 7 gola.
Në një intervistë për “Panorama Sport”, Shkurtaj flet për ekipin e tij , për pritshmëritë e skuadrës ku deklaron:
“Në këto 3-4 ndeshjet e fundit kanë munguar shume lojtarë të rëndësishëm të ekipit, Abazaj, unë, Limaj, Musta, kapiteni Musolli me Laçin, megjithatë ekipi ka luftuar edhe besoj meritonte më shumë pikë. Me Laçin për shembull nuk duhej të jepej ajo penallti, për mendimin tim. Do flisnim ndryshe sot nëse ai episod mjaft i dyshimtë do të gjykohej drejt”.
Ndërsa i pyetur për komentin e bërë nga presidenti Gjici, ku nëse në skuadër mungojnë rezultatet, futbollistëve mund tu mbahet paga, sulmuesi thotë:
“Presidenti ka investuar, dhe patjetër kërkon rezultate, por të jetë i sigurt që të gjithë ne jemi në të njëjtën njësi vale. Edhe ne të gjithë kemi të njëjtin objektiv. Do bëjmë gjithçka në fushë për të arritur rezultatet e duhura dhe për të realizuar objektivat e klubit. Sa u përket rrogave, mendimi im është se nuk duhet të vihen në diskutim, por është presidenti ai që vendos”.
