Presidenti Ilir Meta shpalli dje person “non grata” ambasadorin Bernd Borchardt, i cili është kryesues i Prezencës së OSBE në Tiranë.
Vendimi i Metës erdhi në një kohë kur nga ambasadori Borchardt ka pasur një qëndrim pro nismave të Kryeministrit Edi Rama, duke mbajtur jo vetëm krahun e tij, por edhe duke u shfaqur hera-herës si mbrojtës i Rilindjes.
Ndërkohë ky vendim, ka sjellë reagime të shumta në rrjet, ndërsa karikaturisti i njohur Bujar Kapexhiu, nuk ka humbur rastin për të thumbuar jo vetëm Kryeministrin Edi Rama, por edhe ambasadorin e BE-së, Luigi Soreca, dhe të dërguarën me Punë të Ambasadës së SHBA, Leyla Mosses-Ones. Në karikaturën e Kapexhiut, të botuar në “Mapo” dy diplomatët shfaqen në xhepat e Kryeministrit, ndaj të cilit protestohet me thirrjen tashmë të njohur “Rama ik” me gjithë bagazhe.
Ndërkohë në rrjet mjaft qytetarë kanë zgjedhur të tallen me ambasadorët, që kur s’flasin për politikë, kthehen në ekspertë për gjithçka, duke humbur staturën e tyre.
Fotot e mëposhtme tregojnë edhe humorin në rrjet ndaj diplomatëve, që shfaqen si Guvernatorë, ndërkohë që ndaj tyre lëshohen me qindra kritika nga qytetarë të zakonshëm të vendit.
