Ish-deputetja Albana Vokshi, ka reaguar ashpër lidhur me farsën për kreun e Autoritetit të Mediave, ku njëri prej kandidatëve është Maklen Misha, i biri i Pirro Mishës, që pasi u largua nga AMA u emërua drejtor i Bibliotekës Kombëtare.
Vokshi shprehet se gara ka degjeneruar, pasi kandidatët që paraqitën aplikimet në Kuvend janë të dy zëdhënës ministrash.
Sipas ish-kryetares së Komisionit Parlamentar të Mediave, këta janë gati i’i bëjnë të 99-at medias, për “ta rilindur” dhe atë, siç po bëjnë me “sukses” kudo!
Duke i cilësuar kandidatët si “Fatosat” e partisë, Vokshi shkruan se ata janë gati për të marrë shpërblim dhe të bëjnë kamikazin për uzurpimin e tregut të medias audiovizive, për të penguar me çdo çmim fjalën e lirë dhe për të burgosur e sakatuar gazetarët.
Postimi nga Albana Vokshi
Gara për kreun e Autoritetit të Mediave Audiovizive ka degjeneruar. Ai që Rilindja ka projektuar si kryetar është djali i babit që lëshoi karriken në AMA për t’u bërë drejtor pensionist në Bibliotekën Kombëtare. Tani vendin do e zërë i biri, duke vijuar besnikërinë dhe përuljen ndaj udhëheqjes.
Nuk kishte si të ndodhte ndryshe: Dy kandidatët që paraqitën aplikimin në parlament për postin vakant të kryetarit të AMA ishin të dy zëdhënës ministrish. “Fatosat” e partisë janë gati për të marrë shpërblim dhe të bëjnë kamikazin për uzurpimin e tregut të medias audiovizive, për të penguar me çdo çmim fjalën e lirë dhe për të burgosur e sakatuar gazetarët.
T’i bëjnë të 99-at medias, për “ta rilindur” dhe atë, siç po bëjnë me “sukses” kudo!
