Gjykata për Krime të Rënda, ka shqyrtuar në një seancë të veçantë kërkesën e Kejvina Kthjellës, për “kthim të sendeve të sekuestruara”. Sende që iu sekuestruan në kuadër të hetimeve të atentatit ndaj prokurorit Arjan Ndoja.
Gjykata vendosi që Kejvinës, ti kthejë vetëm celularin, ndërsa nuk ka pranuar të heqë sekuestron e automjetit dhe llogarisë së saj bankare.
Kërkesa
Pasi dha shpjegime për llogari të hetimit të atentatit të 1 nëntorit në Shkozet ndaj prokurorit Arjan Ndoja dhe dy të tjerëve, modelja Kejvina Kthella “trokiti” në dyert e Gjykatës për Krimet e Rënda.
Vajza e showbiz-it depozitoi një kërkesë penale me objekt “kthim të sendeve të sekuestruara”. Kthejlla kërkoi kthimin e aparatit telefonik celular, i cili iu sekuestrua nga prokurorët e Krimeve të Rënda.
Kthella u mor në pyetje për shkak të miqësisë dhe komunikimeve të shpeshta telefonike, thirrje dhe sms, me Redian Rrajën, personin e vetëm të arrestuar deri tani si të dyshuar për atentatin, nga i cili mbeti i vdekur Andi Maloku.
Ky i fundit ishte drejtuesi i mjetit që u qëllua me armë zjarri te mbikalimi i Shkozetit. Të plagosur mbetën prokurori Arjan Ndoja dhe Landi Muharremi. Atentati dyshohet se ka lidhje me detyrën e Ndojës si prokuror.
