Kush është Thomas Strakosha? Portieri që shpëtoi Lazion kundër Leçes apo ai ndaj Cluj, ku me daljen e tij të gabuar iu dha golin e fitores rumunëve. Cilin të marrim për shembull?
Këto janë pyetjet të ditës në mediat italiane, duke pasur në fokus të analizës portierin shqiptar, që nuk luajti me kombëtaren kuqezi në dy kualifikueset e fundit të nëntorit.
Kjo është analiza që i bën “tuttomercatoweb”, portierit shqiptar.
“Do të dëshironin që Strakosha të hiqte maskën për të kuptuar se kush është në të vërtetë. Një portier për Champions apo jo? Të Dielën, kundër salentinëve, ai ishte protagonisti absolut. Pjesa më e madhe e meritave për tre pikët që e ngjitën Lazion në vendin e 3-të në renditje i shkon atij, autori i dy ndërhyrjeve fantastike. I pari në trekëndësh pas një goditjeje nga Babacar, ndërsa për kundërshtarët u shfaq hipnotizues më vonë. Skena u mor me forcë, pas një fillimi të sezonit ku pati shumë kritika. Disa të drejtë, disa jo.
Si çdo lojtar, ai ka bërë shumë gabime në këto vite. Njëri prej tyre e ndëshkoi ekipin e tij kombëtar, Shqipërinë, në ndeshjen kualifikuese me Turqinë, në fushën e kësaj të fundit.
Një gabim serioz, që e minoi përfundimisht rrugën drejt “Euro 2020”, të kombëtares të drejtuar nga Edi Reja. Në vend të kësaj, te Lazio nuk i kujtojmë gabimet makroskopike të Strakoshës, por gjithnjë situatat, për të cilat komenti ishte: mund të bënte më shumë.
Në Glasgow në barazimin 1-1, topi futet në qendër, por ai nuk mundi t’i “tërheqë këmbët”. Kundër Atalantës ishte i palëvizshëm në goditjen e dënimit të Muriel, e cila përshkoi të gjithë zonën. Në “San Siro”, krosi i Biraghi ishte i ngadaltë dhe i butë, mbi të gjitha në zonën e vogël që është territor ajror për portierët. Dhe mund të vazhdojmë me këtë listë të rrethanave, ku Strakosha mund të kishte bërë më mirë.
Në një situatë të tillë, natyrshëm ngrihet pyetja: A ka Lazio dhe trajneri Inzaghi një portier të denjë për Champions? Këtë sezon ka ardhur moment i së vërtetës për të gjithë, edhe për portierin shqiptar. Pas 138 paraqitjeve me Lazio, plus 12 me Salernitana dhe 10 me kombëtaren e Shqipërisë, Strakosha duhet ta heqë maskën e tij dhe t’i bëjë të gjithë të kuptojmë se cili është: ai ndaj Cluj apo i së dielës kundër Lecces”.
