Nga Boldnews.al
Eh çfarë opozite në Parlamentin tonë pluralist… Askush nuk mungoi në atë sallë që sot vijoi serialin e kapjes nga kryeministri Edi Rama. Me 97 vota dhe asnjë kundër, projekt-rezoluta “Shmangia e krizës kushtetuese me synim legjitimitetin e gjykatës kushtetuese – detyrë imperative e organeve më të larta të shtetit”, konfirmoi jo vetëm bindjen qorre politike të deputetëve, por hapi një konflikt që duhet në mënyrë urgjente të ketë një fund.
Edhe teksti i ngjan parullave të partisë mëmë të kohës së komunizmit, të tipit: “Plani 5-vjeçar begatinë do na sjellë”…. Sipas kësaj projekt-rezolute, gjyqtarja Marsida Xhaferllari e dekretuar nga presidenti është akt nul, ndërsa Arta Vorpsi bashkë me Elsa Toska dhe Fiona Papajorgji, të votuara në seancën e së hënës në Parlament duhet të nisin detyrën si anëtare të Gjykatës Kushtetuese.
Edhe konstitucionalisti më i madh botëror, apo një “Ajshjan juridik” do shkulte flokët me këtë lëmsh që ka ngritur politika. Njëra gjyqtare “elitë”, pikërisht Vorpsi për të cilën u mblodh edhe parlamenti ynë, me bekimin e qeverisë shkon dhe betohet tek noteri.
Projekt-rezoluta mori duartrokitje në sallë ku opozitarët e rinj tentonin të binin në sy sa të mundnin me përplasje shuplakash dhe gjeste karagjozësh mbi përbetim se do ta shkatërronin presidentin e republikës.
Të shtjellosh se cili ka të drejtë në aspektin ligjor është një stërmundim më vete, ku është gati në kufijtë e të pamundurës të gjesh gërmë dhe frymë kushtetuese, në këtë anti-kushtetutshmëri që lind në Parlament dhe rritet në qeverisje. Aq sa edhe një juriste e mirë në dukje me urdhër politik shkon dhe betohet para noterit, ku me një akt të tillë pretendon se nesër do jetë një zë i fortë në mbrojtje të ligjit themeltar të shtetit, Kushtetutës së vendit.
Parlamenti është kthyer në një gaztore të madhe, ku deputetët e mazhorancës dhe të opozitës së vetëshpallur çdo ditë e më shumë nënshtrojnë një popull me idiotësinë e tyre. Ashtu në rresht, Lymi, Rudi, Timi, Rabi, Linda etj shohin të madhin Edi Rama i cili jep komandat dhe gjithë pjesa tjetër i përngjan një cirku me kklun, akrobatë dhe kafshë të buta që kërcejnë sipas verdiktit të kryeqeveritarit.
Kjo shfaqje prej kohësh duhet të merrte fund, por për të keqen tonë ata mbahen në pushtet nga “spektatorët” që qellin me xhonglimet e akrobatë dhe gasen me kryekllounin, pa e kuptuar se duhet të vajtojmë të gjithë së bashku për veten.
Kjo nuk është krizë institucionale, madje nuk mund të etiketohet as politike, pasi jemi në një sistem politik që bota se ka njohur kurrë, as diktatorial, as autoritar, as demokraci liberale, por një sistem çmendurie që ka për qëllim vjedhjen, shtypjen dhe larjen e trurit të një populli që ende jeton në këtë vend.
