Elsa Toska dhe Fjona Papajorgji, të zgjedhur nga Kuvendi si anëtare të Gjykatës Kushtetuese, si dhe Marsida Xhaferllari, e dekretuar mbrëmjen e djeshme nga Kreu i Shtetit, Ilir Meta, për vendin vakant në këtë Gjykatë, pritet të betohen sot para Presidentit në një ceremoni që do të zhvillohet në orën 19:00-20:00 në Presidencë.
Sipas një njoftimi zyrtar të publikuar në faqen e Presidencës, Kreu i Shtetit, në mbështetje të nenit 129 të Kushtetutës dhe nenit 8 të ligjit nr. 8577/2000 “Për organizimin dhe funksionimin e Gjykatës Kushtetuese”, të ndryshuar, ka vendosur të thërrasë sot për betim, përpara Presidentit të Republikës, anëtarët e rinj të zgjedhur të Gjykatës Kushtetuese.
“Zonja Elsa Toska e zgjedhur anëtare e Gjykatës Kushtetuese me Vendimin nr. 133/2019 datë 11.11.2019 të Kuvendit të Shqipërisë, thirret për betim përpara Presidentit të Republikës, sot në datë 14.11.2019, ora 19:00.
Zonja Marsida Xhaferllari, e emëruar anëtare e Gjykatës Kushtetuese nga Presidenti i Republikës me Dekretin nr. 11350, datë 13.11.2019, thirret për betim përpara Presidentit të Republikës, sot në datë 14.11.2019, ora 19:30.
Zonja Fiona Papajorgji e zgjedhur anëtare e Gjykatës Kushtetuese me Vendimin nr. 134/2019, datë 11.11.2019 të Kuvendit të Shqipërisë, thirret për betim përpara Presidentit të Republikës, sot më datë 14.11.2019, ora 20:00”, thuhet në njoftimin e Presidencës.
Ceremonia e betimit zhvillohet në Institucionin e Presidentit të Republikës dhe për këtë ftohen të jenë të pranishëm dhe anëtarët e Gjykatës Kushtetuese dhe Sekretari i Përgjithshëm i Gjykatës Kushtetuese.
Njoftimi vjen në një kohë kur nga KED, por edhe mazhoranca e drejtuar nga Edi Rama, si anëtare e Kushtetueses njihet Arta Vorpsi, e renditur e para në listat e Këshillit të Emërimeve në Drejtësi.
Sot Vorpsi u shfaq para një noteri në një akt të paprecedent, ndërsa veprimi shkaktoi habi dhe reagime të shumta.
KED përmes një deklarate të kryetarit Ardian Dvorani, dhe Rilindja, konsiderojnë Vorpsin si anëtare të Kushtetueses, me argumentin se Presidentit i skadoi afati 30 ditor për plotësimin e vakancës dhe në bazë të mekanizmave zhbllokues, ajo merrte funksionet bazuar në renditjen e KED.
Por Presidenca në reagimet e saj bazohet në procedurë, duke e lidhur zgjedhjen e anëtarëve të Gjykatës Kushtetuese me rradhën që duhet ndjekur. Në këtë kuadër, nëse Presidenti emëroi anëtarin e parë të Kushtetueses, rradha i takonte Kuvendit të plotësonte vakancën dhe më pas Gjykatës së Lartë.
