Këshilli i Lartë i Prokurorisë do të intervistojë sot kandidatët për Prokuror të Përgjithshëm.
Në garë janë Arta Marku, e cila prej dy vitesh drejton organin e akuzës si Prokurore e Përgjithshme e Përkohshme, prokurorja e Apelit Fatjona Memçaj dhe prokurori i Krimeve të Rënda, Olsian Çela, të cilët janë zyrtarisht nga KLP si kandidatë për postin e Prokurorit të Përgjithshëm.
Një ditë më parë Këshilli miratoi metodologjinë që do të përdorin anëtarët për të pikëzuar kandidatët.
Kryetari i KLP, Gent Ibrahimi tha se rëndësi në vlerësimin e kandidatëve do ti jepet integritetit dhe aftësive menaxhuese.
“Për aftësitë profesionale ka një marzh vlerësimi nga ana e këshillit që është nga 1 deri në 20 pikë.
Këtu anëtarët e Këshillit orientohen që të shohin të kaluarën se çfarë eksperiencash pune kanë pasur kandidatët. Nëse ata në këto eksperienca pune kanë pasur rastin të administrojnë institucione, kanë pasur rastin të përfaqësojnë çështje në gjykatë”, tha kreu i KLP.
Pikëzimi
Duke iu referuar vendimit të KLP për metodologjinë e vlerësimit të kandidatëve, aftësitë profesionale dhe aftësitë drejtuese do të zënë peshën më të madhe të vlerësimit që do të bëhet me pikë. Kështu, për aftësitë profesionale që përfshijnë rezultatet e arritura në punë, në studime dhe në kërkimet shkencore, duke përfshirë edhe përvojën e punës, kandidatët mund të grumbullojnë deri në 20 pikë.
Për integritetin moral, ku përfshihet reputacioni profesional dhe shoqëror, mund të marrin 4 pikë në total. Për aftësitë drejtuese, që do të vlerësohen nga cilësia e platformës dhe vizionit, aftësia vendimmarrëse, aftësia për të punuar në grup dhe aftësia për përfaqësim publik, kandidatët mund të grumbullojnë 20 pikë.
Gjithashtu, KLP do të vlerësojë kandidatët me pikë edhe për titujt akademikë, studimet dhe trajnimet afatgjata jashtë vendit dhe zotërimin e gjuhëve të huaja. Në mbledhjen e zhvilluar këtë të martë, Këshilli i Lartë i Prokurorisë diskutoi edhe në lidhje me konfliktin e mundshëm të interesit që mund të kishin anëtarët me 3 kandidatët për Kryeprokuror. Vetëm për dy prej tyre u diskutua nëse mund të kishin konflikt interesi, por KLP i rrëzoi pretendimet me anë të një votimi.
Sipas tij, kryeprokurori i ri do të zgjidhet brenda 1 muaji nga dita e nesërme.
