Nga Boldnews.al
Banorët e Unazës së Re në Tiranë, nuk kanë pasur mundësi të shohin video-vizatimin e radhës të publikuar nga Ambasada Amerikane, në të cilën dëshmohet se si paratë e qytetarëve të tyre, të shpërndarë në projekte multi-milionë dollarëshe, kanë përmirësuar luftën kundër korrupsionit në Shqipëri.
Disa prej banorëve të Unazës së Re dergjen në shtretërit e Spitalit të Traumës, pas dhunës barbare të disa “të fortëve” që mbajnë uniformën e Policisë. Disa të tjerë, janë prej shumë orësh në rrugë, duke kundërshtuar me forcën e tyre fizike rruspat e Bashkisë dhe Inspektoratit Ndërtimor.
Ndërsa pjesa më e madhe e tyre, të gjithë viktima të projektit korruptiv qeveritar të Unazë së Re, me shumë mundësi, as nuk duan të dëgjojnë e të shikojnë këtë “propagandë”.
Drejtuesit aktualë të Ambasadës Amerikane në Tiranë kanë gjetur ditën më të papërshtatshme për të shpërndarë slogane mbi anti-korrupsionin në vendin tonë.
Mijëra qytetarë të Tiranës u përleshën që në orët e para të mëngjesit të së Martës me Policinë, e cila i nxori me forcë nga banesat e tyre, për t’i dhënë udhë projektit korruptiv të Unazës së Re.
Ky projekt, ndoshta ndër më korruptivët e më skandalozët e viteve të fundit në Shqipëri, nuk ka hyrë në objektivin e insititucioneve ligjzbatuese shqiptare, për të cilat Ambasada e SHBA thotë se i ka ndihmuar për të forcuar mekanizmat hetimorë.
Drejtueset aktuale të Prokurorisë, të caktuara në ato detyra në kundërshtim me ligjin e të mbështetura fuqishëm nga zyrtarët e Ambasadës Amerikane, nuk kanë kryer asnjë lloj veprimi hetimor mbi tenderat skandalozë të Unazës së Re.
Shqiptarët e panë se si një kompani fantazëm falsifikoi dokumenta të Shteteve të Bashkuara të Amerikës, me të cilat fitoi tenderin e Unazës së Re. Por, askush nuk e lëvizi gishtin. As Ambasada Amerikane, e cila u përfshi në këtë çështje për shkak të dokumentave të falsifikuara, nuk mbajti asnjë qëndrim.
Pamjet kur Policia sulmon me gaz lotjsellës banorët
E sot, kur falë atij projekti korruptiv, mijëra qytetarë po humbasin shtëpitë e tyre, Ambasada Amerikane flet për ndihmën që ka dhënë për luftën kundër korrupsionit. Por, nëse kjo ndihmëse e projekteve multi-milionë dollarëshe nuk siguron hetimin e një rasti të tillë skandaloz, atëherë, përse janë shpenzuar ato para? Ku kanë shkuar?
Ambasada Amerikane thotë se ka investuar në rritjen e transparencës në sallat e gjyqeve. Në fakt, ky investim ishte i rëndësishëm. Por ai investim duket i pavlerë, kur zyrtarët e lartë shqiptarë, të dyshuar si të përfshirë në afera gjigande korruptive, jo vetëm që nuk janë përballur me drejtësinë, por as nuk duket se do të shohin sallat e gjyqeve si të pandehur.
Ambasada Amerikane thotë se, nëpërmjet USAID-it, ajo është e përkushtuar që në vitin 2003 për të forcuar sistemin e drejtësisë në Shqipëri. Dhe, 15 vjet më pas, falë “ekspertëve” të mikluar nga zyrtarë të kësaj ambasade, sot kemi një drejtësi nën varësinë totale të kryeministrit shqiptar.
Madje, kapja e sistemit të drejtësisë nga Edi Rama është arritur edhe nëpërmjet mbështetjes së pakufijshme që zyrtarët e ambasadës amerikane i kanë dhënë regjimit të tij në Shqipëri.
Jo më larg se në fillim të kësaj jave, Ambasada përshëndeti zgjedhjet anti-kushtetuese dhe anti-ligjore të anëtarëve të Gjykatës Kushtetuese nga Parlamenti i Ulsi Manjës.
Më parë ka përshëndetur zgjedhjen anti-kushtetuese dhe të paligjshme të Arta Markut në krye të Prokurorisë. Mbështeti, ose më së paku heshti, kur në institucionet e reja, KLGJ, KLP, KED, KPK, KPA, u caktuan, zgjodhën dhe emëruan persona pa formimin e duhur profesional, jashtë kritereve ligjore dhe, në disa raste flagrante, edhe me probleme të theksuara me integritetin personal.
Dhe sot, kur banorët e Astir-it, pas më shumë se një viti betejë, gjenden nën qiell të hapur, Ambasada Amerikane flet për suksesin e projekteve të saj-Projekte, të cilat nuk bëjnë gjë tjetër veçse forcojnë regjimin e qeverisë së Edi Ramës.
“Ky është sistemi i drejtësisë që Ju, populli shqiptar, meritoni” është slogani përmbyllës i video-vizatimit të radhës të Ambasadës Amerikane në Tiranë. Natyrisht, video nuk përmend asnjë nga problemet që u cekën në këtë shkrim. Në videon e saj, ambasada flet për gjëra të tjera, më soft, me nota optimiste.
https://www.facebook.com/usembassytirana/videos/475955793021727/
