Gjenocid, e ka cilësuar pedagogu Ervin Goci situatën në zonën e Astirit, ndërsa ndodhet i shoqëruar pranë komisariatit numër 3 në Tiranë. Goci ka folur për dhunën që policia ka ushtruar ndaj banorëve te Unaza e Re, madje shprehet se mund të jenë shoqëruar mbi 300 persona.
“Situata për mua është në kufijtë e sulmit të shtetit ndaj qytetarit, ishte e frikshme, ishte thjesht një krehje zone, kapnin njerëzit aty ku ishin nga kafenetë, imagjino që nuk kishte një organizim të policisë.
Në konsideratën time, ky ishte një gjenocid ndaj banorëve, nuk e di sa mund të arrestohen të tjerë, nja 300 i kam parë unë.
Unë jam te komisariati numër 3, maksimumi që ndodh si procedurë është ti e ke emrin dhe po të rrasim brenda, shumica prej këtyre që shohim janë rrasur në qeli kot. Janë me qindra, të paktën nga ajo që pashë unë që janë shoqëruar.
Mua nuk patën mundësi që të më dhunonin, pasi isha larg nga vendndodhja, ishte thjesht një demostrim force. Ka persona që janë shoqëruar dhe të goditur, një djalë e kishte hundën e thyer, e nxorën dhe nuk e di as se ku e kanë çuar”, u shpreh Goci në Fax News.
