“Një banor i Astirit ka humbur jetën, ndërsa një tjetër është në gjendje të rëndë në spital, pas përplasjeve me policinë”. Lajmin e ka bërë me dije Oriola Pampuri, ish-deputetja e PD-së.
Në një prononcim për gazetarët nga zona e Astirit në kryeqytet, Pampuri tha se ka marrë informacione nga banorët se një person ndodhet në morg dhe besohet se kjo ka lidhje me përplasjen me policinë. Megjithatë, shtoi se nuk është konfirmuar ende.
Në një deklaratë të mëvonshme, Spitali i Traumës ka mohuar se ka viktima. “Spitali Universitar i Traumës bën me dije se aktualisht po marrin shërbim 12 persona, nga të cilët 5 efektivë policie dhe 7 protestues, të lënduar në zonën e Astirit. Asnjë prej personave të lënduar nuk është në rrezik për jetën”, thuhet në një njoftim zyrtar.
Që prej mëngjesit të sotëm, IKMT dhe IMT të mbështetur nga policia, kanë nisur aksionin për shembjen e banesave te zona e Astirit. Aksioni është kundërshtuar nga banorët, të cilët janë përplasur me policinë, duke shkaktuar të plagosur nga të dyja palët. Shembja e banesave bëhet në kuadër të projektit për rikonstruktimin e rrugës nga Sheshi Shqiponja deri te mbikalimi pranë Pallatit me Shigjeta.
