Policia u bën apel banorëve të Astirit në kryeqytet, “të distancohen nga dhuna dhe të mos bien pre e provokimeve, pasi do përballen me pasojat ligjore”.
“Gjatë aksionit të nisur mëngjesin e sotëm nga Inspektorati Kombëtar i Mbrojtjes së Territorit për prishjen e 33 objekteve në zonën e ‘Astirit’, për projektin e Unazës së Madhe së kryeqytetit, një grup banorësh kanë kundërshtuar me dhunë punonjësit e IKMT-së dhe punonjësit e Policisë. Banorët kanë sulmuar me gurë, sende të forta dhe bomba moltov punonjësit e Policisë, të cilit ishin planizuar me shërbim. Si pasojë e sulmit mbi Policinë janë plagosur 5 punonjës të Policisë nga FNSH-ja, Shqiponjat dhe Patrullat e Përgjithshme, të cilët u dërguan për ndihmë mjekësore në spitalin ushtarak. Gjithashtu edhe 7 banorë janë lënduar e po marrin ndihmë mjekësore jashtë rrezikut për jetën. Policia e Shtetit u bën thirrje banorëve të distancohen nga dhuna dhe të mos bien pre e provokimeve, pasi do përballen me pasojat ligjore. Gjithashtu, Policia e Shtetit u bën thirrje qytetarëve që janë prezent tek Unaza e Re, të mos nxisin banorët për të sulmuar forcat e Policisë dhe të shmangin deklaratat disinformuese. Policia Rrugore e Tiranës ka bllokuar përkohësisht lëvizjen në të dy krahët e Unazës së Re, deri në përfundim të aksionit të IKMT-së për shembjen e disa objekteve, që do t’i hapin rrugë projektit të ri”, thuhet në një deklaratë të policisë.
Që prej mëngjesit të sotëm, IKMT dhe IMT të mbështetur nga policia, kanë nisur aksionin për shembjen e banesave te zona e Astirit. Aksioni është kundërshtuar nga banorët, të cilët janë përplasur me policinë, duke shkaktuar të plagosur nga të dyja palët.
Banorët e kanë akuzuar Policinë si një bandë shtetërore që po vepron ndaj tyre duke u shtruar dhunë në mënyrë që ti nxjerrë nga banesat. Forcat policore në fakt, kanë ndërhyrë me dhunë, duke përdorur edhe gaz lotsjellës për të nxjerrë nga banesat banorët.
