Kreu demokrat Lulzim Basha ka reaguar rreth mesditës lidhur me dhunën e terrorin e ushtruar ndaj banorëve të Unazës së Re nga policia e Lleshajt.
Dhuna u ushtrua rreth orës 06:00 të mëngjesit dhe zgjati për rreth 2 orë, derisa policia arriti të vendosë nën kontroll zonën ku fadromat e IKMT nisën shembjen e banesave.
Ndërkohë rreth orës 13:00, kreu demokrat ka shkuar në spitalin e Traumës për të vizituar të plagosurit, ku u njoh me gjendjen e tyre shëndetësore.
Në spitalin e Traumës ndodhen 8 qytetarë që ndodhen në pavion dhe po kaq të tjerë në pjesën e urgjencës, disa prej të cilëve të moshuar (mosha 74-80 vjeç).
Basha foli për një skenar për gjakderdhje të Edi Ramës me banorët e unazës së re, ndërsa tha se opozita do të bëjë gjithçka që të mbrojë jetët e qytetarëve.
Në një prononcim për mediat, Basha tha se gjendja e të plagosurve vijon të jetë e rëndë.
“Janë dhunuar në mënyrë barbare, janë gjakosur të moshuar, ka gra të alivanosura nga përdorimi i gazit toksik.
Nga të plagosurit janë edhe 5 efektivë të policisë, të cilët pasi kanë marrë ndihmën janë larguar.
Ky është një bilanc i një goditjeje të planifikuar nga Edi Rama ndaj qytetarëve të pafajshëm dhe të pambrojtur.
Plani i tij ishte që të çonte drejt konfrontimit, gjakosjes, dhunimit, për të fshehur vjedhjen e madhe të Ramës dhe Veliajt, te i ashtëquajturi projekt i Unazës së Re.
Ky projekt ishte një mega vjedhje, e denoncuar nga PD, përmes firmave fantazëm dhe më pas edhe nga mediat ndërkombëtare. Ky nuk është një projekt që ka të bëjë me zhvillimin e qytetit. Edi Rama është i vendosur për të çuar vjedhjen deri në fund, dhe nuk kursen as jetët e qytetarëve.
Paralajmëroj gjithësecilin, që nga urdhëruesit Edi Rama dhe Erjon Veliaj, deri te ekzekutuesit, se do të përballen me ligjin. Dita nuk do të vonojë që ata të përballen me ligjin.
I bëj thirrje qytetarëve dhe çdo punonjësi të ndershëm të policisë që të mos bjerë pre e skenarit të Edi Ramës, që kërkon gjakderdhje.
Jeta është e çmuar dhe ne do të bëjmë gjithçka që të mbrojmë jetët e qytetarëve tanë.
Asnjë centimetër katror nuk do të humbasë, do të kompensohen qindarkë për qindarkë.
Nuk do të gëzojnë asnjë qindarkë ata që janë përgjegjësit e kësaj situate.
Opozita është njish me qytetarët, jo vetëm për të mbrojtur shtëpitë e tyre, por edhe pronën publike”, theksoi Basha.
