Arena Kombëtare/ Shiten të 22 mijë biletat për Francën
Pesë ditë para ndeshjes inauguruese të stadiumit Arena Kombëtare me ndeshjen Shqipëri-Francë, burime të Report TV në Federatën Shqiptare të Futbollit bëjnë me dije se janë shitur të 22 mijë biletat. Kurioziteti për impiantin e ri, tashmë të certifikuar nga UEFA, si dhe dëshira për të parë kampionët e botës ka sjellë një ‘sold-out’ në takimin e parë për Arenën Kombëtare.
Shitja e biletave për këtë takim ka filluar që me datë 1 nëntor dhe ka zgjatur 11 ditë. Ndeshja me Francën është e vlefshme për kualifikueset e Evropianit dhe është e fundit për Grupin H.
Ndërkohë komplet ndryshe paraqitet situata për takimin tjetër që kombëtarja do të luajë të enjten kundër Andorrës. Ka qenë FSHF që ka njoftuar se për këtë sfidë deri më tani janë shitur vetëm 2 mijë bileta. Kjo ka qenë edhe arsyeja që trajneri Edi Reja i ka bërë thirrje tifozëve kuqezi që t’i mbështesin në Elbasan.
