Presidenti serb Aleksandar Vuçiç u shpreh sot se “Mini-Shengeni Ballkanik” është një nismë shumë e rëndësishme për Serbinë, por edhe për vendet e tjera që janë pjesë e saj.
Vuçiç tha se nga kjo marrëveshje të tre vendet do të kursejnë rreth 260 milion dollarë.
Ai tha se falë këtij pakti qytetarët shqiptar dhe ata serb do të mund të hyjnë në shtetet respektive vetëm me letërnjoftime.
“Mini-Shengeni ballkanik është një nismë shumë e mirë për vendin tonë. Është e rëndësishme se si u morëm vesh në një kohë të shkurtër për të arritur një marrëveshje që është në të mirë të qytetarëve tanë.
Mund t’ju them se 260 milion euro do të jetë kursimi nga kjo marrëveshje. Shpresojmë që në të ardhmen të behën pjesë edhe disa vende të tjera. Do shikohet sa e rëndësishme do të jetë për një prodhues nga Jugu apo Veriu që t’i eksportojë ato.
Për më pak se një vit e gjysmë do të keni mundësi të shihni rritjen e investimeve në përqindje për të tre vendet. Do të kemi mundësi që të hyjmë në Shqipëri dhe shqiptarët do të hyjnë në Serbi vetëm me letërnjoftime”, tha Vuçiç në konferencën e përbashkët me Edi Ramën dhe Zoran Zaev, përkatësisht kryeministra të Shqipërisë dhe Maqedonisë së Veriut.
Në vijim ai shtoi se falë kësaj marrëveshjeje, qytetarët do të mund të fluturojnë nga Beogradi drejt Tiranës dhe anasjelltas, pa i pyetur njeri se ku do të shkojnë.
