Në Shqipëri, në dhjetë muajt e fundit janë kthyer 10 mijë e 580 qytetarë shqiptarë që kanë shkelur rregullat e qëndrimit pa vizë në vendet anëtare të Bashkimit Evropian.
Edhe pse kontrollet sa vjen e ashpërsohen ata nuk heqin dorë për të ikur, kudo që munden, në kërkim të një jete më të mirë.
Sipas të dhënave të Top Channel rezulton se mesatarisht 4 shqiptarë çdo ditë kanë tentuar të largohen nga Shqipëria ilegalisht dhe janë kapur nga policia kufitare.
Nga janari 2019 deri në tetor 2019 janë ndaluar në kufi 1233 shtetas shqiptarë që po largoheshin ose përmes kufirit të gjelbër ose me dokumenta të falsifikuara.
Mensur Prenci pagoi 13 mijë euro për trafikantët që ata ta ndihmonin të largohej ilegalisht nga Shqipëria për në Australi. Megjithëse ju premtua përmes një agjencie në Tiranë një udhëtim klandestin, 32 vjeçari nuk mbërriti kurrë në tokën e premtuar. Që prej 2014 , Eduarti edhe ai një ish-emigrant i paligjshëm, është vënë në kërkim të vëllait të zhdukur. Por edhe pse drejtësia pranoi që Mensuri ishte viktimë e një rrjeti trafikantësh, bashkëpuntorët e të akuzuarit nuk u zbuluan asnjëherë./TCH
