Presidenti i vendit Ilir Meta gjatë takimit që ka zhvilluar me arbëreshët e Puljas ka folur për të ardhmen e Shqipërisë dhe fatin e saj që sipas tij është vetëm një dhe ai është rrugëtimi drejt familjes së madhe europiane.“Shqipëria ka vetëm një të ardhme, Europën. Identitetin dhe rrugëtimin europian të Shqipërisë e ka përcaktuar Heroi ynë Kombëtar, Skënderbeu!”
Në kuadër të nismës së ndërmarrë prej Tij “U’ jam Arbëresh”, Presidenti i Republikës Sh.T.Z. Ilir Meta vizitoi Komunën e Kazalvekios në rajonin e Puljas, ku u prit ngrohtësisht nga përfaqësues të shumtë të komunitetit arbëresh dhe autoritetet lokale, të cilat kishin organizuar edhe një aktivitet kulturor për t’i uruar mirëseardhjen Kreut të Shtetit shqiptar.
Në fjalën përshëndetëse, Kryetari i Komunës së Kazalvekios z.Noe Andreano e falenderoi Presidentin Meta për vëmendjen dhe kujdesin e përhershëm të treguar ndaj komunitetit arbëresh, veçanërisht të rajonit të Puglia-s, si dhe vlerësoi nismën “U’ jam Arbëresh”.
Pas takimeve me banorët e shumtë që kishin dalë për ta pritur, Kreu i Shtetit mori pjesë në konferencën me temë “Zhvillimi i raporteve social-ekonomike midis komuniteteve arbëreshe dhe Shqipërisë”.
