Kejvina Kthella, modelja dhe personazhi mjaft i njohur në showbiz-in shqiptar është marrë në pyetje në lidhje me atentatin ndaj prokurorit Arjan Ndoja.
Dosja.al ka mësuar se emri i Kthellës ka dalë nga mesazhet që ka shkëmbyer me Redian Rrajën, nipin e deputetit të PS-së, i cili është i vetmi i arrestuar për ngjarjen në fjalë ku mbetën të plagosur tre persona, prokurori Arjan ndoja, Landi Muharremi i njohur si ‘Rrumi’ dhe shoferi Andi Maloku.
Gjithashtu burime konfidenciale bëjnë me dije për Dosja.al se modeles 24-vjeçare i është sekuestruar telefoni dhe pritet që nga ‘zbërthimi’ i tij të merren vesh të dhëna të tjera në lidhje me lëvizjet që mund të ketë kryer 34-vjeçari Rraja ditët para atentatit, momentin e ngjarjes dhe pas tij.
Mes Kejvinës dhe Redjanit të njohur ndryshe si “Dara” i Krujës ka komunikime të shpeshta por nuk bëhet e qartë marrëdhënia që i lidh bashkë.
Redjan Rraja, u arrestua nga Policia e Shtetit, teksa po tentonte të largohej nga Shqipëria drejt Malit të Zi e më pas drejt Italisë. Ai akuzohet si një nga autorët e atentatit ndaj prokurorit Arjan Ndoja më 1 nëntor 2019. Rraja u zbulua nga shenjët e gishtave të gjetura në një palë syze në makinën Benz ngjyrë gri, që u gjet e padjegur në Ishëm.
Vetë Rraja ka deklaruar se nuk ka marrë pjesë në atentat dhe se ka alibi për vendndodhjen e tij në momentin kur është kryer atentati. Mëgjithatë Gjykata e ka lënë të riun në burg deri në përfundimin e hetimeve për atentatin. Rraja është nipi i deputetit të PS-së, Rrahman Rrajës, i cili është diplomuar për stomatologji dhe prej vitesh jeton në Kanada dhe Shqipëri./Dosja.al/
