Tre shqiptarë dhe një libanez janë dënuar nga gjykata penale e Bruzhit në Belgjikë për përfshirjen e tyre në favorizimin e emigracionit të paligjshëm të më shumë se njëqind personave. Lideri i grupit, Ervin M. 41 vjeç, dënua me pesë vjet burgim efektiv dhe një gjobë 896,000 euro, raportuan mediat lokale këtë të mërkurë.
Në Shtator 2018, banda shqiptare ra në rrjetën e hetuesve britanikë, pasi këta të fundit përgjonin një tjetër grup, që merrej me të njëjtën veprimtari të paligjshme. Falë përgjimeve, funksionimi i bandës u zbërthye nga hetuesit. Bastisja e 6 banesave në 18 dhjetor 2018 çuan në arrestimin e katër të dyshuarve nga autoritet belge.
“Banda punonte me transport të garantuar, me ç’rast drejtuesit e kamionëve ishin në dijeni të kontrabandës. Emigrantët paguan 13,000 paund për një vend në kabinën e kamionit që i çonte në Britani nga Belgjika”, tha prokurori Frank Demeester, seancën e kaluar.
Sipas prokurorisë, banda kontrabandoi 112 emigrantë nga Belgjika në Mbretërinë e Bashkuar në më pak se një vit.
Mbrojtja e Ervin M. këmbënguli për një dënim më të butë sesa pretenca e prokurorisë, që kërkoi 6 vjet burg. Sipas avokatit Sven Mary, organizatori i vërtetë ishte i sigurt në Mbretërinë e Bashkuar dhe jo Ervin M..
Arlind R. 29 vjeç u dënua me 40 muaj burg si shofer i bandës. Për Blerdar S. 39 vjeç dhe Firas K. libanez 46 vjeç, u dha përkatësisht 2 vjet dhe 18 muaj burgim në mungesë. /BN/
