Gjykata e Krimeve të Rënda pritet të caktojë masën e sigurisë ndaj Redjan Rrajës ditën e mërkurë, në një seancë që do të nisë në orën 14:00.
Mësohet se Prokuroria e Krimeve të Rënda do të kërkojë masën e arrestit me burg për Rrajën, i arrestuar sot si i dyshuar lidhur me atentatin ndaj prokurorit Arjan Ndoj dhe dy personave që ndodheshin me të në makinë.
Atentati ndodhi pasditen e së premtes, 1 nëntor, ndërsa prokurori dhe dy personat e tjerë u plagosën.
Referuar raportimeve, Rraja u arrestua pasi gjurmët biologjike të tij u përputhën me ato të gjetura në një makinë të braktisur pranë Fushë-Krujës disa orë pas atentatit.
Ndaj tij ngrihen akuzat “vrasje të funksionarëve publikë”, “vrasje të dy ose më shumë personave e mbetur në tentativë”, dhe “armëmbajtje pa leje”.
Redjan Rraja është një i afërm i deputetit të PS-së, Rahman Rraja.
