Kreu i PD-së, Lulzim Basha ka reaguar arrestimit nga policia të kushëririt të deputetit socialist Rrahman Rrahja.
Rredian Rraja u prangos me urdhër të prokurorisë si i implikuar në atentatin ndaj prokurorit Arjan Ndoja, pasditen e 1 nëntorit. Ngjarje ku mbeti i plagosur prokurori, shoferi i makinës që u qëllua me breshëri plumbash Andi Maloku dhe pasagjeri Landi Muharremi.
“Për atentatin ku ndodhej edhe një prokuror, është arrestuar një i afërm i një deputeti të PS. A keni një koment”, u pyet Basha.
“Fatkeqësisht është në vazhdën e poshtërimit të Partisë Socialiste, në vazhdën e poshtërimit të qytetarëve shqiptarë, sepse tregon që kjo është një luftë e pastër mes bandave në pushtet. Është tregues i qartë i nevojës për ndryshim të menjëhershëm, për zgjedhje të parakohshme, që do t’u kthejnë qytetarëve dinjitetin, të drejtën e votës dhe do t’i fuqizojnë duke zgjedhur në Parlament dhe në qeveri njerëzit që meritojnë të udhëheqin aspiratat dhe dëshirat e tyre për ndryshim. Në funksion të kësaj është edhe turi im që sapo kam nisur. Është një tur bashkëbisedimi dhe dëgjimi, jo vetëm i halleve, brengave dhe i të vërtetës së hidhur si kjo që është shpalosur sot, por edhe i zgjidhjeve, të cilat duhet të prodhojë një qeveri dhe një parlament që të përfaqësojë interesat e qytetarëve dhe jo interesat e bandave kriminale, siç tregon qartë edhe arrestimi i sotëm“, tha Basha, në një prononcim për gazetarët.
