Një nga autorët e dyshuar të atentatit ndaj prokurorit të Durrësit Arjan Ndoja është shoqëruar nga policia.
Burime policore thanë për “Boldnews” se personi i shoqëruar dyshohet të jetë nga atentatorët. Identiteti nuk bëhet me dije për arsye të sekretit hetimor. Aktualisht, grupi hetimor ndodhet në Drejtorinë e Policisë së Durrësit, ku është shoqëruar autori i dyshuar.
Nga atentati i ndodhur pasditen e së premtes së 1 Nëntorit u plagos prokurori Ndoja, shoferi i tij Andi Maloku dhe Aleksandër Laho, i njohur si Landi Muharremi. Të tre ishin duke lëvizur me makinën e prokurorit, kur ndaj tyre është derdhur breshëri plumbash ‘te Mbikalimi i Shkozetit’. “Në aksin rrugor Durrës – Tiranë në afërsi të mbikalimit të Shkozetit, rreth orës 16:30, në afërsi të vendit të quajtur ‘Mbikalimi i Shkozetit’ kanë qëlluar me armë zjarri në drejtim të mjetit me targa AA 333 ZD, e për pasojë janë plagosur shtetasit Aleksandër Laho, 48 vjeç, Arjan Ndoji, 44 vjeç dhe Andi Maloku, 30 vjeç”, njoftoi policia.
Ndoji dhe Laho ndodhen në gjendje të stabilizuar, ndërkohë më e rëndë është gjendja e shoferit të mjetit Andi Malokut, i cili po merr mjekim në spitalin e Traumës.
Disa orë pas atentatit, u gjet një makinë e llojit “Benz 280”, e braktisur pranë varrezave të fshatit Shkafanë të Ishmit, në Durrës.
Dyshimet e grupit hetimor janë se objektiv i atentatit ka qenë prokurori i Durrësit. Një atentat që dyshohet se ka ndodhur për shkak të detyrës, edhe pse vetë prokurori e ka mohuar një gjë të tillë.
