Ambasadori i Bashkimit Europian në Tiranë, Luigi Soreca, është shprehur i zhgënjyer lidhur me zhvillimin e medias në Shqipëri.
Në tryezën e thirrur nga OSBE me përfaqësues të medias, që kryesisht kontrollohen nga Qeveria, Soreca tha se duhet t’i jepet fund ndikimit politik, ndërsa theksoi se ka pasur zhgënjim përsa i takon kushteve politike dhe ekonomike për të zbatuar lirinë e medias.
“Sundimi i ligjit në sektorin e medias është mjaft i rëndësishëm dhe është shumë e rëndësishme që t’i jepet fund ndikimit të politikës në media dhe mungesës së transparencës. Mbështetja jonë është e madhe ndaj lirisë së medias. Bashkë me Këshillin e Evropës kemi prezantuar projektin tonë të përbashkët sa i përket lirisë së medias. Është shumë e rëndësishme liria e shprehjes.
Pavarësia në këtë sektor është tejet e rëndësishme dhe për këtë po luftojnë partnerët tanë.
Duam të mbështesim edhe gazetarët investigativë të pavarur në projektet e tyre. Të japim mbështetje për raportin e paanshëm. Gazetarët duhet të vijnë me ide të reja. Do të japim mbështetje për të gjitha këto.
Jemi plotësisht në anën e gazetarëve në Shqipëri, për të bërë një punë profesionale dhe ashtu siç duhet.
Duhet ndjekur me vëmendje situata politike në vend. BE ka bërë përpjekje për të mbështetur të gjitha shërbimet e medias.
Kemi adresuar të gjitha shqetësimet tona, deri më tani nuk është arritur gjithçka që duam, por po përpiqemi për të ecur përpara.
Komisioni Evropian i ka shprehur të gjitha shqetësimet lidhur me pasiguritë ligjore dhe për median audiovizive”, tha Soreca.
Deklaratat e ambasadorit të BE-së vijnë në një kohë kur Kryeministri Edi Rama dhe zyrtarë të Rilindjes kanë nisur një fushatë me padi gjyqësore ndaj mediave.
Ndërkohë që në rrjetet sociale janë raportuar me dhjetra raste të mbylljeve të llogarive, që kanë shfaqur mendime kundër apo kritike ndaj Kryeministrit Rama apo Rilindjes.
Gjithashtu nga ana e qeverisë ka pasur tentativa të pafundme për kapjen apo kontrollin e mediave online, përmes kontrolleve tatimore, sikundër ndodhi pak javë më parë, ose presioneve të tjera.
