Kryeministri Edi Rama zhvillon sot një vizitë zyrtare në Romë, ku do të takohet me homologun e tij, Giuseppe Conte.
Sikundër raportohet, në orën 13:00, të dy kryeministrat do të kenë sot një drekë pune.
Marrëdhëniet mes dy vendeve janë cilësuar si të shkëlqyera në takimin që Conte pati në Shqipëri rreth 2 javë më parë, ndërsa theksi pritet të vihet mbi mundësinë e shtimit të investimeve italiane në Shqipëri.
Nuk dihet nëse Kryeministri italian do t’i përsërisë Ramës sugjerimin që Qeveria të përgatisë ofertën për zgjidhjen e krizës politike, sikundër tha Conte në konferencën për mediat në Tiranë.
Vizita e fundit zyrtare e kryeministrit Rama në Romë u zhvillua në tetor të 2017 në kohën e qeverisjes së kryeministrit Paolo Gentiloni.
Vizita e kryeministrit shqiptar në Itali vjen pasi Komisioni Europian vendosi të shtyjë datën e hapjes së negociatave për pranimin e Shqipërisë në Bashkimin Europian e pak ditë pas vizitës së kreut të ekzekutivit italian në Tiranë ku shpehu qartë mbështetjen e fortë të Italisë për rrugëtimin e Shqipërisë drejt BE.
