Ndërkohë që Vera Grabocka dhe Alketa Vejsiu kanë vënë veton dhe bëjnë çfarë duan në RTSH, fusin dhe heqin këngëtarë, blejnë dhe shesin teknikë, kompozitorë dhe kompani me të cilat do të shpenzojnë 360 milionë lekët që Festivali i Këngës në RTSH ka si buxhet, në televizionin Klan ka plasur sherri.
Urdhri i Aleksandër Frangajt këto ditë është i prerë: do të pushohet nga puna çdo teknik apo specialist që pranon të punojë për Vera Grabockën dhe Festivalin e Këngës në Televizionin Publik. Zallamahia ka zënë të madh e të vogël dhe askush nuk arrin të kuptojë se pse Frangaj e ka kapur kaq me të keq, pse Vera, gjithësesi, hyn e del në Klan duke qeshur dhe ç’ka ndodhur me Ardit Gjerbrean që rri si “pulë”.
Disa ditë pas urdhrit, u zbulua edhe sekreti. Vera Grabocka dhe Alketa Vejsiu janë organizatoret e këtij viti të Festivalit të Këngës në RTSH. Meqë premtimi që ky projekt do t’u jepej atyre është bërë me kohë, Thoma Gëllçi, drejtori i përgjithshëm i RTSH është kujdesur të miratojë buxhetin më të lartë ndër vite të Festivalit të Këngës. Dihet se Vera dhe Alketa nuk luajnë për pak gjë, prandaj nuk është as rastësi dhe as çudi që, prej javësh tashmë, dyshja fort e njohur në ca rrethe dhe biznese, ka vënë veton për çdo vendim që del për Festivalin e Këngës. Do të bëhet siç duan ato dhe me kë të duan ato.
Mirëpo, dashje pa dashje, Vera i ka prishur punë Ardit Gjerberas, i cili ka javë që tek spektakli i tij i së dielës, prezanton konkurentët e këtij viti të Kënga Magjike. Siç dihet të dy festivalet zhvillohen afër njëri-tjetrit në afate kohore dhe xhelozia mes palëve është kthyer tanimë në një luftë të heshur. Arditi i ankohet Sandrit se Vera i sabotoi festivalin, ndërsa Vera mundohet të marrë punjonjës nga Klani që ti përdorë për vete në Festivalin e Këngës. E meqë Ardit Gjerbrea, edhe pse e ka të vetin festivalin “Kënga Magjike”, e prezanton në publik si produksion të Aleksandër Frangajt, duket se ka fituar më shumë pikë. Sandri ua ka ndaluar punonjësve të tij, çdo bashkëpunim jashtë televizionit me Vera Grabockën.
Thonë se Vera dhe Arditi kanë pasur edhe një përplasje të vogël mes tyre, por nuk e kanë reflektuar jashtë mureve të zyrës së këtij të fundit. Nëpër korridore përshëndeten edhe pse nëpër rrethe të ngushta betohen se në rastin më të parë do i sabotojnë festivalet respektive.
E ndërsa Arditi vazhdon i pikëlluar prezantimin e këngëtarëve të tij, Vera Grabocka i ka vënë vulën pjesëmarrësve të tij këtë vit. Ka zëra që flasin edhe për një kontratë që qarkullon nën dorë dhe i detyron këngëtarët të pranojnë fituesin e shpallur me kohë nga dyshja e tmerrshme e spektaklit, por për këtë do të flasim në ditët në vazhdim./Pamfleti
