Një operacion i gjerë policor në Spanjë ka çuar në pranga disa shtetas shqiptarë, që dyshohet se janë pjesë të një rrjeti ndërkombëtar që trafikonte marijuhanë në brendësi të Europës.
Operacioni i koduar “Bela” u zhvillua në rajonet e Andaluzisë dhe Almeries, ndërsa u arrestuan 11 persona të moshës 34-50 vjeç me shtetësi shqiptare, italiane dhe polake.
Më i riu prej shqiptarëve, vetëm 34 vjeç, ishte shpallur në kërkim 9 herë, ndërsa ndaj bashkëkombësit të tij 44-vjeçar, ishte lëshuar një urdhërarrest europian nga autoritetetet italiane.
Policia sekuestroi 436 kilogramë marijuhanë, 246 mijë euro, një kamion dhe sende për paketimin dhe peshimin e lëndës narkotike.
Policia kishte rënë në gjurmët e trafikantëve prej korrikut të kaluar, kur gjatë një kontrolli të rastësishëm të një kamioni do të zbulonin 94 kilogramë marijuhanë.
Më 17 tetor të këtij viti, një tjetër verifikim në mjetin e drejtuar nga 44-vjeçari shqiptar do të çonte në zbulimin e një sasie prej 70 kilogramë marijuhanë dhe 270 kilogramëve të tjerë lëndë narkotike të magazinuar në një fermë në bregdetin juglindor të Spanjës.
Sasia besohet se do të transportohej me automobila të mëdhenj të marrë me qira nëpër destinacione europiane, si Gjermania, Italia dhe Polonia.
