KLGJ në mbledhjen e sotme pritet të marrë vendime lidhur me kthimin ose jo në sistemin e drejtësisë të disa kandidatëve.
Kështu në pikën e parë është shqyrtimi i kërkesës për rikthimin në detyrë të Guximtar Boçit, gjyqtarit të Gjirokastrës, i shkarkuar mbi dy vjet më parë, pas publikimit të një video-skandali. Por një vendim i Gjykatës së Apelit Vlorë ka shpallur të pafajshëm Boçin, i cili kërkon rikthimin në detyrë.
Në video-skandal, Boçi shfaqej duke kërkuar favore seksuale në këmbim të drejtësisë. Denoncimi në atë kohë u bë nga qytetarja Rudina I, por në fund Apeli e shpalli të pafajshëm Boçin.
Një tjetër gjyqtar që kërkon rikthimin është Tunxh vatnikaj. Ky i fundit ka drejtuar edhe Komisionin e Kthimit të Pronave gjatë qeverisjes së PD-së.
Vatnikaj ka kërkuar që në vitin 2014, kohë kur KLD-ja drejtohej nga Presidenti Bujar Nishani që të rikthehej në sistemin e drejtësisë.
Vatnikaj në një prej letrave të tij thotë se me një mbledhje të KLD-së në vitin 2008, kur edhe u largua si gjyqtar, Këshilli i ka miratuar ruajtjen e statusit të gjyqtarit.
Një tjetër emër është ai i gjyqtarit Osman Aliu. Ky i fundit, i akuzuar dhe i larguar nga detyra për fshehje të pasurisë, fitoi pafajësinë në Gjykatën e Apelit. Pas vendimit të Gjykatës së Rrethit Tiranë në tetor 2014, ka qenë Gjykata e Apelit që pak ditë më parë ka vendosur pafajësinë e Osman Aliut.
Sipas vendimit të Gjykatës së Apelit, veprimet e kryera nga gjyqtari Osman Aliu dhe bashkëshortja, me disa shuma financiare të cilat ua ka dërguar të afërmve të familjes me transferta të vogla të përmuajshme, nuk përbëjnë fshehje dhe as mosdeklarim të pasurisë.
Edhe Aliu kërkon rikthimin në detyrë si gjyqtar.
Ndërkohë kandidati i katërt është Ligoraq Toshi, i cili ka mbajtur detyrat e kancelarit të Gjykatës së Korçës.
