Parlamenti nis të martën procedurat për zgjedhjen e anëtarëve të rinj të Gjykatës Kushtetuese. Është Komisioni Parlamentar i Ligjeve, i cili pritet të dëgjojë kandidatët, emrat e të cilëve janë depozituar në Kuvend nga KED.
Një vend vakant në Gjykatën Kushtetuese u shpall në 12 shkurt 2018 dhe për këtë vakancë KED dërgoi emrin e Arta Vorpsit, e cila renditet e para në listë me 89.642 pikë. Emri tjetër që pasonte ishte Elsa Toska me 85.428 pikë dhe emri i tretë ishte Besnik Muçi me 81.928 pikë.
Ndërsa vakanca e dytë në Gjykatën Kushtetuese u shpall në 4 mars 2019. Edhe për këtë vakancë, KED i dërgoi një tjetër listë Kuvendit, ku në krye të saj qëndronte sërish Arta Vorpsi. E dyta në renditje ishte Fiona Papajorgji me 88.785 pikë dhe e treta Elsa Toska me 85.428 pikë.
Sipas ligjit, brenda 30 ditësh Kuvendi duhet të zgjedhë anëtarët në një nga 3 emrat e parë të listave. Në rast se Kuvendi nuk shprehet brenda këtij afati, atëherë kandidati i parë në listë konsiderohet i emëruar.
Pas dëgjesës, Komisioni do të hartojë një raport për secilin prej juristëve për t’ia përcjellë më pas parlamentit. Ky i fundit do të vendosi me 84 vota se cilët do të jenë dy anëtaret e rinj të Gjykatës Kushtetuese. Votimi e kandidatëve në parlament është planifikuar të zhvillohet më 14 nëntor. Pas këtij votimi Gjykata Kushtetuese do të ketë 5 anëtarë.
Ndërkaq kreu i shtetit Ilir Meta, pas zgjedhjes së gjyqtarit Besnik Muçi, ka afat deri në 8 nëntor për të zgjedhur një tjetër anëtar të kësaj gjykate.
Mungesa e Gjykatës Kushtetuese është një nga ngërçet që ka krijuar Reforma në Drejtësi dhe një nga debatet më të mëdha mes maxhorancës dhe opozitës.
