Halil Matoshi, këshilltar i kryeministrit në detyrë të Kosovës, Ramush Haradinaj, ka reaguar lidhur me takimin e Kryeministrit Edi Rama me aktorin francez Gerard Depardieu, dhe kandidatin për kryeministër të Kosovës, Albin Kurti.
Foto e publikuar nga Rama, është realizuar në Tiranë, ku Kurti kishte shkuar ta takonte Kryeministrin.
Në një shkrim në rrjetet sociale, Matoshi thotë se fotografisë së Kurtit, Ramës dhe Depardieut i mungon edhe adhuruesi i Sllobodan Millosheviçit, austriaku Peter Handke.
Shkrimi i plotë i Matoshit:
Darka e gabuar … dhe Albin Kurti
(Njerëz kontrovers në një fotografi familjare)
Gerard Depardieu, njeriu që pasi iku nga Atdheu i tij Franca, për shkak të taksave, u gjet në përqafim të Presidentit autoritar rus Putin, u vlerësu se asht nderë për Gjirokastrën me ia dhënë “Çelësin e qytetit”!?
Njësoj pati vepruar Edvin Rama kur i pati dhënë “Çelësin…” e Tiranës, Goran Bregoviçit, mikut të shovenistit serb Emir Kusturica, njiherit mik i “Kasapit të Ballkanit”, Milosheviç.
Porse, fotografia familjare e Edvinit dhe Albinit me aktorin francez, nuk e plotëson mozaikun pa Peter Handken, mikun tjetër të Milosheviçit!?
Rama është mirë me propozu dhënien e “Çelësit të Vlorës” – qytetit të Ismail Qemal Vlorës, nobelistit austriak, derisa në anën tjetër, kërcënon dhe fyen Heroin e gjallë të Kosovës dhe homologun e tij kosovar, në detyrë, Ramush Haradinaj!???
Degradimi i vlerave morale që njihen si vlera të përbashkëta europiane, nuk ka të sosun në tokën e shqiponjave.
Pse i kafshohet shpirti Kosovës?
P.S. Vlerat e përbashkëta i mbrojnë në Beograd Natasha Kandiç dhe Çedomir Jovanoviç, por Rama dhe kryebashkuakët e qyteteve shqiptare nuk u kujtuen me i nerue ata!?
