Celula terroriste aktive në Shqipëri u zbulua nga informatorë të brendshëm. Sipas drejtorit të Përgjithshëm të Policisë së Shtetit, Ardi Veliu, autoritetet shqiptare i kanë identifikuar këta individë dhe informacioni i siguruar nga informatorë nga brenda organizatave kriminale i ka lejuar autoriteteve shqiptare që të parandalojnë planin e marsit 2018 dhe planifikimet eventuale për sulme nga figurat e krimit të organizuar që kishin si objektiv MEK-un për llogari të regjimit Iranian.
Celula drejtohet nga operativi i Forcave QUDS, i njohur si PEYMAN.
PEYMAN është rezident i përhershëm në Iran dhe menaxhon në distancë një numër operativësh në Shqipëri dhe në vende të tjera në Evropën Qendrore dhe Perëndimore. Mes të tjerash, ai inicioi dhe zbatoi tentativën e fundit për sulm në muajin mars 2018. PEYMAN menaxhon shumë operativë, disa për grumbullim informacioni dhe të tjerë për të kryer sulme terroriste.
Por sipas Policisë shqiptare, operativët kriminelë, me bazë në Ballkan, që janë vartës të TURGUT-it ose të një trafikanti droge turk të lidhur me të, nga viti 2018, janë dërguar në Shqipëri për të avancuar planifikimin e sulmeve kundër MEK-ut, siç ishte diktuar nga MALEK ZADEH dhe Forcat QUDS.
Sipas kreut të Policisë së Shtetit, celula do të vepronte në festën e Sulltan Novruzit të 2018.
Nëse i referohemi zhvillimeve në këtë datë 22 mars 2018, policia e Tiranës ndaloi një shtetas iranian pranë ambienteve të Kryegjyshata Botërore Bektashiane. Emri i të arrestuarit nuk u bë publik, por duket se ky ka qenë çelësi i zbulimit të celulës, që sot bëri të njohur kryepolici Veliu.
Çfarë u raportua për arrestimin e iranianit në 22 mars 2018
Policia e Tiranës ka bërë të mundur arrestimin e një shtetasi të Iranit, i cili dyshohet se mund të kryente sulm terrorist. Iraniani është arrestuar mëngjesin e sotëm (22 mars 2018) pranë ambienteve të Kryegjyshata Botërore Bektashiane.
Siguria në këtë zonë ka qenë tepër e lartë për shkak se zhvillohen festimet për Sulltan Novruzin, festa më e rëndësishme për besimtarët bektashinj, ndërkohë që zyrtarët më të lartë të shtetit, përfshirë presidentin e Republikës, kanë qenë te Kryegjyshta për urime.
Emri i të arrestuarit nuk është bërë publik dhe nuk dihet nëse ai ka hyrë në territorin shqiptar si pjesë e grupit të muxhahedinëve iranianë që jetojnë në Shqipëri, apo në forma të tjera.
