Ish-deputeti i LSI-së, Endrit Braimllari, ka akuzuar kryeministrin Edi Rama si shkaktarin e mos çeljes së negociatave duke paralajmëruar se opozita sëshpejti do të rifillojë protestat.
I ftuar në Report Tv, Brahimllari ka shfajësuar opozitën kur tha se djegia e mandatave nuk ishte arsye për refuzim, pasi sipas tij i kanë kërkuar kryeministrit bisedime për nxjerrjen e vendit nga kriza.
Ai risolli në vëmendje fjalët e presidentit francez Macron i cili theksoi se shumica e vendeve ishin kundër Shqipërisë.
“Vendi është në një situatë mjaft të rëndë. Ka një kokëfortësi të një kryeministri të papërgjegjshëm që po e çon vendin në greminë. Protesta ka pasur kudo, fermerët në Lushnje, kudo Shqipëria është në protestë, por suporti jonë ka qenë te hapja e negociatave.
LSI-ja po flet për vendimmarrjen, zgjedhje të parakohshme do të ishin minimumi për këtë kryeministër. Zgjedhjet e parakohshme duhen sa më parë. I kemi parë si Edi Rama mashtron.
9 kushtet e Bundestagut nuk i shmang dot.
Mbledh kryesinë e PS dhe bën sikur prodhon lajm, e cila është kthyer në Rilindje. Sot duhet të flasim si do të dalim nga kriza, pse nuk e propozon. Opozita është e qartë, protestat janë në axhendën e cdo opozite, Edi Rama e kishte mundësinë të çlironte vendin nga kjo pengmarrje, tani është në dorë të qytetarëve.
E dëgjuat cfarë tha Macron, pjesa më e madhe vendeve ishin kundër Shqipërisë. Shqiptarët duan të jenë pjesë e BE-së, por Rama nuk do. Çfarë i kushtonte të ulej në dialog me opozitën? Nuk e shoh si arsye për bllokimin e negociatave, djegien e mandateve. Mos hapja e negociatave ishte një ngjarje shumë e rëndë për klasën politike” deklaroi ai.
