Ambasadori i Britanisë së Madhe, Duncan Norman, ka nisur një takim me kreun e PD-së, Lulzim Basha, në zyrën e tij në selinë e kësaj partie.
Takimi ka nisur pas një deklarate të kreut të PD-së, Lulzim Basha, që i kërkoi kryeministrit Edi Ramë të dorëhiqet, ndërsa theksoi se vetëm një qeveri e re do të çelë rrugën e integrimit të vendit. Situata politike në vend dhe zgjidhja e krizës pritet të jenë çështjet që do të diskutohen ne takimin mes Bashës dhe diplomatit britanik.
Tre ditë më parë, Këshilli Evropian nuk miratoi çeljen e negociatave me Shqipërinë dhe Maqedoninë e Veriut, edhe pse sipas deklarimeve të Presidentit francez Emmanuel Macron, kjo e fundit “u dogj” për faktin e Shqipërisë.
Kriza politike në vend vijon të mbetet e pazgjidhur dhe palët ende nuk janë dakordësuar për gjetjen e zgjidhjeve.
Bundestagu ka miratuar një paketë me 9 kushte që duhet të plotësohen nga Shqipëria, ndërsa opozita ka deklaruar se ato përbëjnë udhërrëfyesin për daljen nga kriza.
