Humbja me Mallorcën ishte gjëja e fundit që i nevojitej Realit të shtunën mbrëma , pasi kishin shpresuar që ta linin sezonin e kaluar pas krahëve.
Të pamposhtur në kampionat përpara kësaj sfide, ekipi u demoralizua pas ndeshjes duke parë edhe që Barcelona mori kreun e tabelës.
Këto janë disa nga shqetësimet për Realin, të listuar nga gazeta spanjolle “Marca”.
Golat
Ky është problemi më i madh për skuadrën e Zinedine Zidane, i cili akoma pritet të zgjidhet, edhe pse ka kaluar më shumë se një vit që nga largimi i Cristiano Ronaldos.
Reali i Madridit ka shënuar vetëm 18 gola në 11 ndeshje dhe Benzema është lojtari i vetëm i cili ka përmbushur pritshmëritë , me Eden Hazard që akoma nuk ka gjetur veten e tij dhe i mungojnë rastet para portës, ndërsa Luka Jovic akoma nuk ka shënuar golin e tij të parë.
Paqëndrueshmëria
Pas 11 ndeshjes këtë sezon, vetëm pesë janë fituar, as vetëm gjysma.
“Mbretërit” akoma nuk kanë fituar ndeshje radhazi dhe kanë siguruar vetëm një fitore nga katër ndeshjet e fundit, ndërsa pas 2 ndeshjes në “Champions League”, nuk kanë asnjë fitore.
Intensiteti
Reali i Madritit nuk i starton mirë ndeshjet, për shkak të mungesës së intensitetit, e provuar në ndeshjen me Mallorcën, dhe kundër Villareal, Paris Saint- Germain dhe Club Brugge.
Është një problem që është bërë evident, që nga humbja 7-3 kundër Atleticos së Madridit në miqësore.
Portieri nën presion
Të gjithë sytë janë te Thibaut Courtois, i cili kaloi nga portieri më i mirë në kupën e botës te fakti që fishkëllehet nga publiku ndërsa Alphonse Areola duartrokitet.
Ai ka pësuar 9 gola nga 14 gjuajtjet e fundit që kanë ardhur drejt tij.
Dëmtimet
Këtë sezon ekipi ka pësuar 22 dëmtime te 16 lojtarë të ndryshëm, dhe jemi akoma në muajin tetor.
Shumica e tyre kanë qenë dëmtime muskulore, gjë që të bën të mendosh se është një problem më serioz sesa thjesht fat i keq.
