Policia e Kukësit ka dhënë detaje mbi ngjarjen e rëndë të ndodhur paraditen e sotme në vendin e quajtur Sasat në malin e Gjallicës, kur një ari sulmoi një bari 45 vjeç.
Mësohet se ariu i ka shkaktuar dëmtime të shumta bariut në kokë, këmbë, shpatull.
I plagosuri është Ekrem Onuzi. Mësohet se ai ka qenë me bagëti, kur qentë sulmuan arushën dhe më pas ajo i është sulur atij.
“Gjendja është katastrofë. I kanë shkuar persona të fshatit atje për ta ndihmuar. Kemi tre orë që kemi njoftuar. Është e pamundur që të transportohet në rrugë tokësore. Duhet katër orë që të shkojnë atje,” tha një prej banorëve.
Policia Kukës/ Informacion paraprak:
Jemi njoftuar në sallën operative se në vendin e quajtur Sasat, mali i Gjallices, shtetasi E.O., rreth 45 vjeç, banues në fshatin Nangë, duke kullotur bagëtitë është sulmuar nga një Ari, duke i shkaktuar plagë në kokë, shpatull dhe në këmbë.
Policia është nisur drejt vendit të ngjarjes.
Nga Tirana është nisur dhe helikopteri në ndihmë, për shkak të terrenit të vështirë malor.
