Opozita pritet që t’i rikthehet sërish protestave. Është ish-deputeti i Partisë Demokratike, Gent Strazimiri, i cili në një intervistë për Ora News ka deklaruar se nuk ka rrugëzgjidhje tjetër.
Sipas tij, akuzat e opozitës ndaj qeverisë i faktuan edhe 9 kushtet e Bundestagut gjerman dhe vetë fjala e presidentit francez Emmanuel Macron.
“Protestat do të jenë të pandalshme. Një regjim i tillë kriminal siç u vërtetua në Bruksel me gojën e presidentit Macron dhe me 9 pikat e Bundestagut të përpiluara dhe mbrojtura nga kancelarja Merkel. Nuk ka rrugëzgjidhje tjetër vetëm se protestë, protestë, protestë deri në fund. Kurrë nuk janë falur të drejtat veçanërisht nga një narkobandë dikujt që ja ka shkelur”, është shprehur Strazimiri.
Opozita e Bashkuar kishte marrë një vendim që, deri në vendimin e Këshillit të Evropës për hapjen ose jo të negociatave nuk do të protestonte. Por tani që Brukseli e dha përgjigjen e tij, opozita bëhet gati për të nisur valën e re të reagimit qytetar.
