Disa mijëra komente janë postuar në faqen e Kryeministrit Edi Rama në rrjetet sociale, pas konferencës së tij për mediat, ku dështimin për hapjen e negociatave ia faturoi BE-së dhe veçanërisht Francës dhe Holandës.
Ajo që bie në sy nga komentet e ndjekësve në rrjet janë që një pjesë i drejtohen kryeministrit duke e fajësuar lidhur me dështimin, dhe i kërkojnë dorëheqjen dhe zgjedhje të parakohshme, ndërsa të tjerë akuzojnë Francën dhe Presidentin Macron.
Duket sikur faqja zyrtare e Kryeministrit në rrjetin social është kthyer në një shesh beteje mes mbështetësve të tij, që në mungesë të argumenteve sulmojnë Europën, një ide e artikuluar edhe nga vetë Rama, dhe të tjerëve që i kërkojnë dorëheqjen.
Mes shumë komenteve mund të gjenden pjesëtarë të administratës publike, që të urdhëruar ose jo, kanë zgjedhur të fyejnë Presidentin e Francës dhe të mbrojnë atë që ironizohet si lider global.
