Ekzekutimi i presidentit të vetëshpallur të Republikës së Çamërisë Festim Lato në 19 korrik bëri shumë bujë në Holandë. Autorët e ngjarjes ende janë të paidentifikuar.
Por, mediat holandeze i janë rikthyer sërish kësaj çështjeje, pasi mbrëmjen e djeshme kanë publikuar pamjet e fundit para se ta vrisnin, të cilat i përkasin datës 15 korrik, kur Policia Holandeze ka rikrijuar skenën e lëvizjeve të Latos.
Ai është larguar nga Afferden për të shkuar në Abcoude, për një takim pune. 1 orë e gjysëm më pas, ai është filmuar në fshatin pranë Amsterdamit, A2. Në pamje, ai shfaqet i shoqëruar nga tri burra dhe një grua. Lato zbret nga mjeti, dhe shkon të blejë diçka për të ngrënë në një dyqan fruta-perimesh. Më pas shkon edhe ulet në një kafene. Kush ishin të pranishëm në këtë takim, dhe përse bëhet fjalë, ende nuk është e qartë për autoritetet holandeze. Në këtë takim, Festim Lato bën edhe një foto, duke bërë që gjithçka të duket në rregull.
Pas një ore, ai del jashtë dhe kamerat e rrugëve e kanë filmuar teksa lëviz në drejtim të shoqëruesve të tij. Në orën 12:15, Festimi hyn në makinën sportive të një burri, me të cilin ndodhej brenda në kafene. Dhe nga ky moment, për të nuk dihet më asgjë.
Mediat holandeze, hedhin spekulime se ngjarja mund të ketë ndodhur pasi Lato ka mashtruar shumë njerëz duke iu marrë atyre para. Ai kishte borxhe tek kompani dhe individë privatë në shumën e miliona eurove dhe kjo është pista kryesore e hetimit.
