Nga Boldnews.al
Mungesa e avokatëve të viktimës, prania e të cilëve nuk është e domosdoshme në një proces penal ku janë të pranishëm prokurorët dhe pala e akuzuar, gjithësesi nxiti gjyqtarin Artan Gjermeni që të shtynte me rreth 2 javë procesin gjyqësor të njohur me emrin “Geron Xhafaj”.
Dy avokatët mbrojtës të Geron Xhafaj, i cili pretendon se është viktimë nga vepra penale e “kallëzimit të rremë”, me një shkresë zyrtare, kërkuan nga gjykata që të shtynte seancat për 10 ditë, pasi ata do të jenë jashtë Shqipërisë.
Kërkesa e avokatëve të viktimës u pranua edhe nga prokurori në seancë, Genc Qana. Ndërkohë, avokatët mbrojtës të gazetarit Jetmir Olldashi dhe ish-deputetit Ervis Salianji, konkretisht Indrit Sefa dhe Ledio Braho, kërkuan që seanca të vijojë, duke e vlerësuar se shtyrja e seancës për këtë shkak nuk parashikohet në procedurë dhe, në vlerësimin e tyre, kërkesa duket si një manovër për të shtyrë procesin.
Megjithatë, gjyqtari Gjermeni vendosi të pranojë kërkesën e avokatëve të viktimës dhe e shtyu seancën për në datë 30 Tetor.
Para se të jepte këtë vendim, gjyqtari njoftoi se Ministria e Drejtësisë kishte dorëzuar në gjykatë përgjigjen që autoritete belge u kishin dhënë atyre shqiptare, lidhur me statusin ligjor të Albert Veliut, i cili ka kërkuar azil politik në atë vend.
Kjo përgjigje pritej që të mbërrinte në gjykatën penale javën e kaluar. por, siç u tha në seancë, shkresa e Ministrisë së Drejtësisë ishte dërguar në adresë gabim (në adresën e gjykatës civile të Tiranës).
Pas 15 ditësh, më në fund, shkresa e Ministrisë së Drejtësisë, në të cilën përcillej përgjigja e kërkesës së autoriteteve belge e datës 26 Gusht, mbërriti në gjykatën e Tiranës.
Në atë shkresë konfirmohej fakti se, në periudhën e përpilimit të saj, shtetasi Albert Veliu, i cili është i akuzuar për kallëzim të rremë pas akuzave ndaj Agron Geron Xhafaj për përfshirje narkotikësh, ishte i ndaluar në zbatim të urdhër-kërkimit ndërkombëtar shqiptar.
Por, ajo shkresë, për shkak edhe të kohës që ka kaluar, nuk kishte më tepër të dhëna nëse shtetasi Albert Veliu vijon të jetë i ndaluar apo ndaj tij të kenë filluar procedurat e ekstradimit. Gjithashtu, shkresa nuk kishte një përgjigje nëse kërkesa e Albert Veliut për azil politik ishte marrë apo jo në konsideratë nga autoritetet belge.
“Gabimi” i adresës nga ana e Ministrisë së Drejtësisë, e cila shtyu procesin me 15 ditë, e lidhur me kërkesën e avokatëve për shtyrje me 10 ditë, në total 25 ditë, duket si një tentativë e avokatëve të viktimës, me mbështetjen e plotë të gjyqtarit dhe prokurorëve të çështjes, për të shtyrë sa të mundin procesin gjyqësor.
Veprimet e institucioneve të drejtësisë krijojnë dyshime se gjyqtari Gjermeni, prokurorët e çështjes dhe avokatët e viktimës shpresojnë në një rikthim të shpejtë të Albert Veliut, personazhi që akuzoi Agron (Geron) Xhafaj, vëllain e ish-ministrit të Brendshëm, Fatmir Xhafaj, për vijimin e aktivitetit kriminal të trafikut të narkotikëve.
Në një situatë të vështirë dhe nën presion që ndodhet aktualisht sistemi i drejtësisë, shumë njerëz duket se kanë interes që Albert Veliu të rikthehet në Shqipëri dhe, me metoda “bindjeje”, siç vepruan me “dëshmitarin e rremë” Fred Alizoti, të arrijnë të sigurojnë një tërheqje dëshmie nga ana e denoncuesit të Geron Xhafaj.
Ndaj, deri në një ekstradim të Albert Veliut, gjë e cila nuk është ende e sigurt, duket se po bëhet çmos që seancat të shtyhen.
Pas “gabimit në adresë” nga Ministria e Drejtësisë dhe “udhëtimit të avokatëve të viktimës për 10 ditë”, me shumë mundësi, priten të tjera justifikime për shtyrjen e procesit.
Shqipëria ka hyrë në stinën e virozave, kështu që nuk do të jetë aspak “surprizë” nëse disa nga personat e përfshirë në proces, të kërkojnë shtyrje për shkaqe gripale e të ngjashme.
