Përditësuar/ Zbardhen emrat e të arrestuarve gjatë aksionit policor në Vlorë, me urdhër të prokurorisë. Në pranga janë Cerciz Velaj, Enton Likaj, Daniel Nikaj, Altin Veizaj (Shkelzen), Antonio Veizaj, Marjo Veizaj, Romeo Likaj, në kuader të operacionit të koduar “Vjeshta”. Tre persona të tjerë u shpallën në kërkim.
Hetimet
Burime zyrtare nga policia njoftuan se, ky operacion është realizuar në kuadër të hetimeve të zhvilluara në bashkëpunim me Prokurorinë e Rrethit Gjyqësor Vlorë, të cilat kanë zgjatur për një periudhë 6-mujore. Operacioni është përqëndruar në dokumentimin dhe goditjen e aktivitetit kriminal kryesisht kundër ”Kultivimit të bimëve narkotike”, por edhe veprave të tjera penale si ”Prodhimi dhe shitja e narkotikëve” e kryer në bashkëpunim, ”Shpërdorimi i detyrës”, ”Armëmbajtja pa leje” dhe ”Moskallëzimi i krimit”.
Aksioni
“Gjatë këtij hetimi është dokumentuar ky aktivitet kriminal për një nga zonat me risk të lartë për kultivimin e bimëve narkotike, siç janë Njësitë Administrative të Bashkisë Selenicë. Gjithashtu u bë shpallja në kërkim e 3 shtetasve të tjerë dhe vijon puna për kapjen e tyre. Në vazhdimësi të këtij hetimi, janë evidentuar 24 raste të kultivimit të bimëve narkotike në 5 Njësitë Administrative (Armen, Sevaster, Brataj, Kotë dhe Vllahinë), ku më parë janë arrestuar, proceduar dhe shpallur në kërkim 16 persona (8 të arrestuar, 4 në kërkim, 4 në gjendje të lirë). Janë sekuestruar 3 armë zjarri (2 kallashnikov dhe 1 pistoletë), 1 226 000 lekë dhe 4 850 €uro, 3 automjete dhe 19 aparate celulare, si dhe janë asgjësuar bimë dhe fidanë kanabis sativa. Vazhdojnë hetimet për dokumentimin e plotë ligjor për persona të tjerë të përfshirë në këtë aktivitet kriminal, si dhe po punohet për kapjen e personave të shpallur në kërkim”, njoftoi policia.
***
Aksioni në Vlorë/ Vijojnë arrestimet pas kapjes së Tesi Bashos
Policia e Vlorës, reparti FNSH dhe Shqiponja kanë zhvilluar një mega-operacion gjatë natës në disa fshatra të qytetit, ku kanë arrestuar disa persona.
Mësohet se personat e arrestuar janë shpallur prej kohësh në kërkim për vepra penale që lidhen me drogën.
Pritet një konferencë shtypi për të mësuar më shumë mbi këtë operacion.
Operacioni vjen një ditë pas arrestimit të Tesilvan Basho.
