Të shtëna me armë zjarri janë shënuar orët e para të kësaj të marte në Durrës. Nga të shtënat nuk raportohet për persona të lënduar.
Burime zyrtare nga policia lokale bënë me dije se është qëlluar drejt një automjeti të parkuar në pronësi të një 29-vjeçari, ku nuk ndodhej njeri. Dyshimet e para të grupit hetimor janë se plumbat mund të jenë një paralajmërim për të riun. Ai është marrë në pyetje dhe grupi hetimor po punon për të zbardhur ndonjë konflikt të mëparshëm të që mund të ketë pasur 29-vjeçari, e që mund të ketë çuar në ngjarjen e kësaj të marte.
“Rreth orës 00:45, në lagjen nr.4 Durrës është qëlluar me armë zjarri tip pistoletë mjeti tip ‘Volswagen’, i parkuar, në pronësi të shtetasit I.B., 29 vjeç, banues në Durrës. Grupi hetimor po punon për sqarimin e rrethanave të ngjarjes, identifikimin dhe kapjen e autorit. Materialet u referuan ne Prokurorinë e Rrethit Gjyqësor Durrës për veprime të mëtejshme”, njoftoi policia.
