Deputetja Rudina Hajdari ka reaguar lidhur me shkarkimin e saj nga drejtimi i Grupit Parlamentar Demorkat.
Në një postim në rrjet, Hajdari shkruan se Korbab Lita dhe “gangsterët e tij kanë ushtruar presion ndaj deputetëve për të firmosur”.
Sipas saj, presion është ushtruar dhe ndaj deputetes Fationa Dhimitri, e cila kërkon që të tërheq firmën e saj.
Po ashtu Hajdari bëti të ditur se çështja tashmë do shkojë në Prokurori, pasi për të është një puç.
“Përveç një protagonizmi të shëmtuar mediatik, Korab Lita dhe gangsterët e tij, kanë ushtruar presion ndaj deputetëve, përfshirë edhe zj. Fatjona Dhimitri, e cila ka firmosur, për tërheqjen e këtij puçi. Pamjet filmike të disponuara nga zyrat e Kuvendit do t’i çohen Prokurorisë”, shkruan Hajdari.
Ndërkohë, Fationa Dhimitri, e cila ka votuar për shkarkimin e Hajdarit dhe zëvendësimin e saj me Korab Litën, përmes një letre drejtuar Gramoz Ruçit, bën me dije se tërhiqet nga ky vendim. Madje ajo paralajmëron se nëse Lita mbetet kryetar Grupi ajo do të largohet.
Nuk dihet se çfarë po ndodh me deputetët e asaj që quhet si “opozita e re”, të cilët pasi kanë marrë një vendim me datën 11 tetor dhe pasi vendimi është publikuar janë tërhequr nga firmat. Më parë janë denoncuar raste kur kandidate për deputete tërhiqeshin nga hyrja në Parlament duke ia lënë vendin pasardhësit në listë. Por duket se çudirat në politikën shqiptare vazhdojnë.
Deklarata e Korab Lita
“Është diskutuar për funksionimin e grupit parlamentar ku pasi janë bërë prezentë nga të gjithë anëtarët e grupit të gjitha problematikat e hapura deri tani, i është kërkuar zonjës Hajdari të tërhiqet nga drejtimi i grupit dhe të vazhdojë me detyrat e tjera mjaft të rëndësishme që ka në mbështetje të grupit. Pas bërjes prezent të shpërdorimit të besimit tonë prej 6 muajsh si në aspektin organizativ, politik dhe deri në atë ligjor, zonja Hajdari në mënyrë verbale deklaroi dorëheqjen e saj në mënyrë verbale përballë grupit.
Pas këtij momenti grupi kaloi në procesin zgjedhor të zgjedhjes së kryetarit të tij. Për këtë arsye u propozuan tre kandidatura z.Alban Zeneli, z.Halit Valteri dhe Korab Lita. Z.Alban Zeneli u tërhoq nga gara dhe në garë ngelën dy kandidatura. Halit Valteri dhe Korab Lita. Zoti Valteri kërkoi kohë për të takuar kolegët me qëllim lobimin për vota nga kolegët për këtë detyrë. Me unanimitet grupi vendosi që t’i jepet kohë zoti Valteri deri ditën e nesërme datë 11 tetor 2019.
Në këtë mbledhje pasi kishte bërë lobim dhe nuk gjeti mbështetje nga kolegët për këtë detyrë, zoti Valteri deklaroi se tërhiqet dhe më mbështet mua në këtë garë. Për këtë u votua në mënyrë të hapur dhe u përpilua procesverbali i mbledhjes dhe u vendos nga të gjithë të pranishmit në mbledhje, në mënyrë unanime.
Pas këtij momenti në respekt të rregullores së Kuvendit, neni 16, pika 2 është bërë procedura për të njoftuar kryetarin e Kuvendit për ndryshimet e bëra. Kjo procedurë është firmosur nga 7 anëtarët e grupit, përfshirë edhe zotin Valteri, procedurë e cila u dërgua në protokollin e Kuvendit të Republikës së Shqipërisë. Kjo është e gjitha ajo çka ka ndodhur, në respekt të informimit të opinionit publik”, deklaroi Korab Lita, në një konferencë për mediat nga Kryesia e Kuvendit.
