Nuk ka shpërblime për Vitin e Ri/ Akti i qeverisë “harron” pensionistët, shtresat në nevojë dhe…

Në fundvit pensionistët, shtresat në nevojë apo buxhetorët nuk do të marrin shpërblime. Kjo të paktën sipas aktit normativ të qeverisë për ndryshimet në buxhet, që u miratua edhe në komisionin parlamentar të Ekonomisë dhe Financave.

Megjithëse gjatë diskutimeve, deputetët propozuan përcaktimin e një fondi për dhënien e shpërblimeve në fund të vitit, veçanërisht për pensionistët dhe shtresat në nevojë, një gjë e tillë nuk u pranua.

Pak ditë më parë, Kryeministri Edi Rama në një takim me oligarkët, foli për fondin e solidaritetit, duke u kërkuar atyre që 2 % të dividentit të tyre, të përdorej për të varfërit.

Rama e konsideroi këtë nismë në kuadrin e Shqipërisë solidare, ndërsa ministrja e Financave Anila Denaj, tha se në muajt në vijim, qeveria do të bëjë një vlerësim lidhur me një gjë të tillë.

LEXO EDHE  Akuzat/ Dvorani: Kam marrë pjesë në një tryezë të thirrur nga PS, por...

Gjithsesi në qeverisjen e Edi Ramës, kjo nuk është hera e parë që mungon shpërblimi për shtresat në nevojë apo pensionistët, të cilëve u janë akorduar shuma që variojnë nga 3-5 mijë lekë.

Akti Normativ i buxhetit 2019 ka ulur parashikimet për të ardhurat që do të vijnë nga tatimet e doganat me 10 milionë dollarë, ku goditjen më të madhe e jep Tatimi mbi Vlerën e Shtuar, raporton TV Klan.

Megjithatë ruhen balancat e defiçitit dhe borxhit publik, sipas parashikimeve fillestare. Qeveria ka shtuar fonde për Bulevardin Verior të Tiranës dhe rehabilitimin e lumit të Lanës, si dhe përshpejtimin e punimeve për By Pass-in e Fierit.

Në bazë të tabelës së buxhetit, detyrime të prapambetura në infrastrukturë rezultojnë të jenë 62 milionë dollarë, fonde të cilat ende nuk janë buxhetuar.